Apbhramsa Pandulipi Chayanika

Author(s): Kamalchand Sogani
Publisher: Apbhramsa Sahitya Academy

Page 109

पाठ८
पउमचरिउ
कुइय मणु। मरु मरु णीसरु णीसरु भणंतु। धूमद्धउ व्व धगधगधगन्तु। भय भीसणु कुरुडु सणिच्छरु व्व। वहु उवविस विण्णउ विसहरु व्व॥ घत्ता ॥ किं कालु कियंतु मित्तु वरिउ। किं केसरि केसरग्गि वरिउ। को जम मुह कुहरहो णीसरिउ। जो भवणे महारइ पइसरिउ॥१३ ।। तं वयणु सेप्पिणु महुमहणु। आरुट्ठ समरभर उव्वहणु। णं धाइउ करि थिरथोरकरु। उम्मूलिउ दियवरु जेम तरु। उग्गामिवि भामिवि गणयले। किर घिवइ पडीवउ धरणियले। करे धिउ ताम हलपहरणेण। मुए मुए मा हणहि अकारणेण। दियय ताल गोल पसु तवसि तिय। छ वि परिहरु मिल्लिवि माण किय। तं णिसुणेवि दियरु लखणेण। णं मुक्कु अलक्खणु लक्खणेण। असरिउ वीरु पच्छामुहउं। अंकुस निरुद्ध नं मत्तगउ। पुणु हियइ वसूरइ खणि जे खणे। सय खंड खंडु वरि हूउ रणे॥ घत्ता॥ वरि पहरिउ वरि किउ तव चरणु। वरि विसु हालाहलु वरि मरणु। वरि अच्छिउ गंपिणु गुहिल वणे णवि निविसु वि अच्छउ अवुहयणेण ॥१४॥ तो तिण्णि वि एम चवंताई। उम्माहउ जणहो जणंताइ। दिण्ण पच्छिम पहर विणिग्गयई। कुंजर इव विउल वणहो गयइ। वित्थु रण्णु पइसंति जाव। णंग्गोह महदुमु दिट्ट ताम। गुरु वेसु करिवि सुंदर सराई। णं विहय पढावइ अक्खराइं। वुक्कण किसलय कक्कार भणंति। वाउलि विहंग किक्की भणंति। वण कुक्कुड कुक्कू आयरन्ति । अण्णु वि कलाव केकइ चवंति। पियमाह विअ कोक्कउ लवंति। कंका वप्पीह समुल्लवंति। सो तरुवरु गुरु गणहर समाणु। फल पत्त वंतु अखर निहाणु॥ घत्ता॥ पइसंतिहिं असुर विमद्दणेहिं। सिरु णामेवि राम जणद्दणेहिं । परियचिवि दुमु दसरह सुएहि । अहिणंदिउ मुणि व सइंभुएहि ॥ १५ ॥ ब॥ ॥ २७॥ ब॥ सीय सलक्खणु दासरहिं तरुवरु मूले परिट्ठिय जावेहिं । पसरइ सुकइहे कव्वु जिह। मेह जालु गयणंगणे तावेहिं । ब॥ पसरइ मेह विंदु गयणंगणे। पसरइ जेम सेण्णु समरंगणे। पसरइ जेम तिमिरु अण्णाणहो। पसरइ जेम वुद्धि वहु जाणहो। पसरइ जेम पाउ पाविट्ठहो। पसरइ जेम धंमु धंमिट्ठहो।
अपभ्रंश-पाण्डुलिपि चयनिका
(94)
Jan Education International