Anandadidas Uvasagkathao

Author(s): Amrut Patel
Publisher: ZZ_Anusandhan

Page 17

जून २००९
१७
अह कुंडकोडिओ तं पभणई उट्ठाण-कम्म-विरियाई । जइ नत्थि, तुमे लद्धा, कहं इमा (कहिमा) भो! दिव्वदेविड्डी ? ॥१७०।। अह भणसि अणुट्ठाणाइणा इमा भो ! मए समणुपत्ता । ता किं ते न लहंती उट्ठाणाई न जेसऽत्थि ? ॥१७१।। इय कुंडकोलिएणं भणिओ सो संकिओ नियमणम्मि । न खमो वुत्तुं मुत्तुं मुद्दाईयं गओ देवो ॥१७२॥ अह तत्थ बीयदिवसे सहसंबवणम्मि जिणसमोसरणं । नाऊण कुंडकोलिय-उवासगो हट्ठ-तुट्ठमणो १७३॥ नियपरियणपरियरिओ कंपिल्लपुरस्स मज्झमज्झेणं । गंतूण जिणं पणमिय धम्मं निसुणेइ विणयजुओ ॥१७४|| तयणंतरं जिणेणं भणिओ सो कुंडकोलिओ एवं । तुझंऽतिए य देवो समागओ कल्लमवरण्हे ॥१७५।। मिच्छद्दिट्ठी तुमए विहिओ निप्पट्ठ-पसिण-वागरणो ॥ तो धन्नो सि तुमं जो, करेसि एवं कुपहमहणं ॥१७६।। आमंतेउं गोयमाईसमणा उ तह[य] समणीओ । भणइ जिणो जइ गिहिणो, मिच्छद्दिट्ठीण निम्महणं ॥१७७|| एवं कुणंति, चउदसपुव्वीहिक्कारसंगधारीहिं । सविसेसं कायव्वं तुब्भेहिं कुतित्थिनिम्महणं ॥१७८।। पडिवण्णं जिणवयणं 'तह' त्ति समणेहिं तह य समणीहिं । तो कुंडकोलिओ नमिअ जिणवरं सगिहमणुपत्तो ॥१७९।। सीलव्वयाई सम्मं पालितो कुंडकोलिओ सड्ढो । साहुजणदाणनिरओ चउदसवरिसे अइक्कमइ ॥१८०॥ पनरसमे पुण वरिसे गिहवावारं निवेसियं सयलं । जिट्ठसुयम्मि सयं पुणो(ण) पोसहसालाए सुद्धमणो ॥१८१।। एक्कारस पडिमाओ कमसो सुत्ताणुसारओ सम्म । पालितो विहिणा सो जाओ तवसोसियसरीरो ॥१८२।। सावयपरियायं सो परिवालेऊण वीस वासाई । काऊण मासमेगं पज्जते अणसणं विहिणा ॥१८३।।