Agam 08 Antgaddasao Attham Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 3

बालब्रह्मचारी श्री नेमिनाथाय नमः
नमो नमो निम्मलदंसणस्स
ॐ ह्रीं नमो पवयणस्स
८ अंतगडदसाओ - अट्ठमं अंगसुत्तं
• पढमो वग्गो •
[] १-१०-अज्झयणाणि ॥
[१] तेणं कालेणं तेणं समएणं चंपा नामं नयरी, पुन्नभद्दे चेइए-वण्णओ, तेण कालेणं तेणं समणं अज्जसुहम्मे समोसरिए परिसा निग्गया जाव पडिगया ।
तेणं कालेणं तेणं समएणं अज्जसुहम्मस्स अंतेवासी अज्जजंबू जाव पज्जुवासमाणे एवं वयासी- जइ णं भंते समणेणं भगवया महावीरेणं आदिकरेणं जाव संपत्तेणं सत्तमस्स अंगस्स उवासगदसाणं अयमट्ठे पन्नत्ते अट्ठमस्स णं भंते! अंगस्स अंतगडदसाणं समणेणं० जाव संपत्तेणं के अट्ठे पन्नत्ते ?
एवं खलु जंबू! समणेणं जाव संपत्तेणं अट्ठमस्स अंगस्स अंतगडदसाणं अट्ठ वग्गा पन्नत्ता, जइ णं भंते! समणेणं जाव संपत्तेणं अट्ठमस्स अंगस्स अंतगडदसाणं अट्ठ वग्गा पन्नत्ता पढमस्स णं भंते! वग्गस्स अंतगडदसाणं समणेणं जाव संपत्तेणं कइ अज्झयणा पन्नत्ता ?
एवं खलु जंबू! समणेणं जाव संपत्तेणं अट्ठमस्स अंगस्स अंतगडदसाणं पढमस्स वग्गस्स दस अज्झयणा पन्नत्ता [तं जहा ] ।
[२]
गोयम समुद्द सागर गंभीरे चेव होइ थिमिए य । अयले कंपिल्ले खलु अक्खोभ पसेणई विहू ।।
[३] जइ णं भंते! समणेणं भगवया महावीरेणं जाव संपत्तेणं अट्ठमस्स अंगस्स अंतगडदसाणं पढमस्स वग्गस्स दस अज्झयणा पन्नत्ता पढमस्स णं भंते! अज्झयणस्स अंतगडदसाणं समणेणं जाव संपत्तेणं के अट्ठे? पन्नत्ते,
एवं खलु जंबू! तेणं कालेणं तेणं समएणं बारवई नामं नयरी होत्था - दुवालस-जोयणायामा नवजोयणवित्थिण्णा धणवति - मइ - निम्मया चामीकर - पागारा नाणामणि- पंचवण्ण- कविसीसगमंडिया सुरम्मा अलकापुरि-संकासा पमुदिय-पक्कीलिया पच्चक्खं देवलोगभूया पासादीया दरिसणिज्जा अभिरुवा पडिरूवा । तीसे णं बारवईए नयरीए बहिया उत्तरपुरत्थिमे दिसीभाए एत्थ णं रेवयए नामं पव्वएहोत्था-वण्णओ, तत्थ णं रेवयए पव्वए नंदनवण्णे नामं उज्जाणे होत्था वण्णओ, सुरप्पिए नामं जक्खायतणे होत्था पोराणे०, से णं एगेणं वणसंडेणं, असोगवरपायवे,
तत्थ णं बारवईए नयरीए कण्हे नामं वासुदेवे राया परिवसइ महया रायवण्णओ, से णं तत्थ समुद्दविजयपामोक्खाणं दसण्हं दसाराणं- बलदेवपामोक्खाणं पंचण्हं महावीराणं पज्जुण्णपामोक्खाणं अद्धुट्ठाणं कुमारकोडीणं संबपामोक्खाणं सट्ठीए दुद्दंतसाहस्सीणं महासेणपामोक्खाणं छप्पन्नाए बलवसाहस्सीणं वीरसेणपामोक्खाणं एगवीसाए वीरसाहस्सीणं उग्गसेणपामोक्खाणं सोलसहं रायसाहस्सीणं रूप्पिणीपा- मोक्खाणं सोलसण्हं देवीसाहस्सीणं अनंगसेणापामोक्खाणं अणेगाणं गणियासाहस्सीणं, अण्णेसिं च बहूणं ईसर-जाव-सत्थवाहाणं बारावईए नयरीए अद्धभरहस्स य समत्थस्स आहेवच्चं जाव विहरइ । [दीपरत्नसागर संशोधितः ]
[2]
[८-अंतगडदसाओ]