Agam 08 Antgaddasao Attham Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 9

तए णं से कण्हे वासुदेवे पोसहसालाओ पडिनिवत्तइ पडिनिवत्तित्ता जेणेव देवई देवी तेणेव उवागच्छड़ उवागच्छित्ता देवईए देवीए पायग्गहणं करेइ करेत्ता एवं वयासी-होहिए णं अम्मो! मम सहोदरे कणीयसे भाउए त्ति कट्ट देवई देविं ताहिं इट्ठाहिं जाव आसासेइ आसासेत्ता जामेव दिसं पाउब्भए तामेव दिसं पडिगए । वग्गो-३, अज्झयणं-८
तए णं सा देवई देवी अन्नया कयाइं तंसि तारिसगंसि वासघरंसि जाव: सीहं सुमिणे पासित्ता पडिबुद्धा जाव पाढया हद्दहियया परिवहइ ।
तए णं सा देवई देवी नवण्हं मासाणं जासुमण-रत्तबंधजीवय-लक्खारस-सरसपारिजातकतरुणदिवायर-समप्पभं सव्वणयणकंत-सुकुमालपाणिपायं जाव सुरूवं गयतालुसमाणं दारयं पयाया जम्मणं जहा- मेहकुमारे जाव जम्हा णं अम्हं इमे दारए गयतालुसमाणे तं होउ णं अम्हं एयस्स दारगस्स नामधेज्जे गयसकुमाले, तए णं तस्स दारगस्स अम्मापियरो नामं कयं-गयसकमालो त्ति सेसं जहा- मेहे जाव अलं भोगसमत्ते जाए यावि होत्था ।
तत्थ णं बारवईए नयरीए सोमिले नाम माहणे परिवसइ-अड्ढे रिउव्वेय जाव सुपरिणिहिए यावि होत्था, तस्स सोमिल-माहणस्स सोमसिरी नामं माहणी होत्था-सूकुमालपाणिपाया, तस्स णं सोमिलस्स धूता सोमसिरीए माहणीए अत्तया सोमा नाम दारिया होत्था, सोमाला जाव सुरूवा रूवेणं लावण्णेणं उक्किट्ठा उक्किट्ठसरीरा यावि होत्था, तए णं सा सोमा दारिया अण्णया कयाइ बहाया जाव विभूसिया बहहिं खुज्जाहिं जाव परिक्खित्ता सयाओ गिहाओ पडिणिक्खमइ पडिणिक्खमित्ता जेणेव रायमग्गे तेणेव उवागच्छड उवागच्छित्ता रायमगंसि कणगतिंदूसएणं कीलमाणी चिट्ठइ ।।
तेणं कालेणं तेणं समएणं अरहा अरिहनेमी समोसढे, परिसा निग्गया, तए णं से कण्हे वासुदेवे इमीसे कहाए लद्धढे समाणे पहाए जाव विभूसिए गयसकुमालेणं कुमारेणं सद्धिं हत्थिखंधवरगए सकोरेंटमल्लदामेणं छत्तेणं धरिज्जमाणेणं सेयवरचामराहिं उद्धृव्वमाणीहिं बारवईए नयरीए मज्झंमज्झेणं अरहओ अरिट्ठनेमिस्स पायवंदए निग्गच्छमाणे सोमं दारियं पासइ पासित्ता सोमाए दारियाए रूवेण य जोव्वणेण य लावण्णेण य जायविम्हए, कोइंबियपरिसे सद्दावेइ सद्दावेत्ता एवं वयासी-गच्छह णं तब्भे देवाणप्पिया० सोमिलं माहणं जायित्ता सोमं दारियं गेण्हह गेण्हित्ता कण्णंतेउरंसि पक्खिवह, तए णं से कण्हे एसा गयसुकुमालस्स कुमारस्स भारिया भविस्सइ, तए णं कोइंबियपरिसा तेव पक्खिवंति ।
तए णं से कण्हे वासुदेवे बारवईए नयरीए मज्झंमज्झेणं निग्गच्छइ निग्गच्छित्ता जेणेव सहसंबवणे उज्जाणे जाव पज्जुवासइ, तए णं अरहा अरिहनेमी कण्हस्स वासुदेवस्स गयसुकुमालस्स कुमारस्स तीसे य० धम्मकहाए कण्हे पडिगए ।
तए णं से गयसुकुमाले अरहओ अरिहनेमिस्स अंतिए धम्म सोच्चा जं नवरं अम्मापियरं आपुच्छामि जहा मेहो महेलियावज्जं जाव वढियकले, तए णं से कण्हे वासुदेवे इमीसे कहाए लद्धढे समाणे जेणेव गयसुकुमाले तेणेव उवागच्छइ उवागच्छित्ता गयसुकुमालं आलिंगइ आलिंगित्ता उच्छंगे निवेसेइ निवेसेत्ता एवं वयासी- तुमं णं ममं सहोदरे कणीयसे भाया तं मा णं तुं देवाणुप्पिया! इयाणिं रहओ मुंडे जाव पव्वायाहिं, अहण्णं तुमे बारवईए नयरीए महया-महया रायाभिसेएणं अभिसिंचिस्सामि, तए णं से गयसुकुमाले कण्हेणं वासुदेवेणं एवं वुत्ते समाणे तुसिणीए संचिट्ठइ ।
[दीपरत्नसागर संशोधितः]
[8]
[८-अंतगडदसाओ]