Agam 04 Ang 04 Samvayanga Sutram Tika

Author(s): Abhaydevsuri, Jambuvijay
Publisher: Mahavir Jain Vidyalay

Page 514

षष्ठं परिशिष्टम् ।
एतेण कारणेण उ पुरिसजुगे अट्ठमम्मि वीरस्स । सयराहेण पणट्ठाई जाण चत्तारि पुव्वाइं ॥८०२।। अणवठ्ठप्पो य तवो तवपारंची य दो वि वोच्छिन्ना । चोद्दसपुव्वधरम्मी, धरंति सेसा उ जा तित्थं ॥८०३।। तं एवमंगवंसो य नंदवंसो य मरुयवंसो य । सयराहेण पणट्ठा समयं सज्झायवंसेण ॥८०४॥ पढमो दसपुव्वीणं सयडालकुलस्स जसकरो धीरो । नामेण थूलभद्दो अविहिंसाधम्मभद्दो त्ति ॥८०५॥ नामेण सच्चमित्तो समणो समणगुणनिउणचिंचइओ । होही अपच्छिमो किर दसपुव्वी धारओ धीरो ॥८०६।। (गा. ८०७-३६. सुयवोच्छेयकमनिरूवणं) एयस्स पुव्वसुयसायरस्स उदहि व्व अपरिमेयस्स । सुणसु जह अथ (?इत्थ) काले परिहाणी दीसते पच्छा ॥८०७॥ पुव्वसुयतेल्लभरिए विज्झाए सच्चमित्तदीवम्मि । धम्मावायनिमिल्लो होही लोगो सुयनिमिल्लो ॥८०८॥ वोलीणम्मि सहस्से वरिसाणं वीरमोक्खगमणाओ । उत्तरवायगवसभे पुव्वगयस्सा भवे छेदो ॥८०९।। वरिससहस्से पुण्णे तित्थोगालीए वड्डमाणस्स । नासीही पुव्वगतं अणुपरिवाडीए जं जस्स ॥८१०॥ पण्णासा वरिसेहिं य बारसवरिससएहिं वोच्छेदो । दिण्णगणि-पूसमित्ते सविवाहाणं छलंगाणं ॥८११॥ नामेण पूसमित्तो समणो समणगुणनिउणचिंचइओ । होही अपच्छिमो किर विवाहसुयधारको धीरो ॥८१२।। तम्मि य विवाहरुक्खे चुलसीतीपयसहस्सगुणकलिओ । सहस च्चिय संभंतो होही गुणनिप्पलो लोगो ॥८१३॥ समवायववच्छेदो तेरसहिं सतेहिं होहि वासाणं । माढरगोत्तस्स इहं संभूतजतिस्स मरणम्मि ॥८१४।। तेरसवरिससतेहिं पण्णासासमहिएहिं वोच्छेदो । अज्जवजतिस्स मरणे ठाणस्स जिणेहिं निद्दिवो ॥८१५।। चोद्दसवरिससतेहिं वोच्छेदो जेट्ठभूतिसमणम्मि ।