________________
આનો અર્થ? આ જ કે તમે જો સુંદર પરિણામને ઝંખો છો તો તમે એ પરિણામ તરફ લઈ જતી પ્રક્રિયાને આરંભી દો. તમે જો કાર્યને સંપન્ન થઈ ગયેલું જોવા ઇચ્છો છો તો એ કાર્ય માટે જરૂરી કારણોને હાજર કરી દો. તમને સફળતા મળી જ સમજો.
તું આજ સુધીમાં એક પણ ક્ષેત્રમાં જો સફળ નથી બની શક્યો તો એની પાછળનું કારણ આ જ રહ્યું હશે. પરિણામનું ભારે આકર્ષણ પણ પ્રક્રિયાની ધરાર ઉપેક્ષા!
હા, મનનો આ જ તો સ્વભાવ છે. લૉટરીની ટિકિટ લેવા એ એક રૂપિયો ખરચવા તૈયાર નથી અને એક કરોડના ઈનામની અપેક્ષા રાખીને બેસે છે. પ્રક્રિયાના માર્ગ પર કદમ માંડવા એ ગલ્લાં-તલ્લાં કરતું રહે છે અને સુંદર પરિણામ ન મળતાં એ હતાશ થઈ જાય છે.
યાદ રાખજે તું આ વાત કે મન પરિણામપ્રેમી છે જ્યારે અંતઃકરણ પ્રક્રિયાપ્રેમી છે. તું જો સુંદર પરિણામને ઝંખી રહ્યો છે તો એ પરિણામ તરફ દોરી જતી પ્રક્રિયાને પ્રારંભી દે. માળી પાણી મૂળને પાય છે અને ફળ વૃક્ષ પર આવે છે એ તારા ખ્યાલમાં હશે જ.
