Sagardatt and Lalitang Rasaka

Author(s): Shantisuri , Ishwarsuri, Shilchandrasuri, H C Bhayani
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 108

[95]
गाथा अह राया ललिअंगो, ललिअंग चंप-नयरि-वर-रज्जं । कुणमाणो कयसुकयं, जाओ लोयाण सुह-हेऊ ।। ५१६ अह एगया सु पुच्छिय, सुपरिक्खिय नामयं निअं सइवं । सकलत्तो संचलिओ, सह परिवारेण सारेण || ५१७ निय-नयर-पियर-दंसण-उक्कंठिय-नियय-हियय-साणंदो । ललिअंग-नरवरिंदो, पत्तो सिरिवास-पुर-तीरं ।। ५१८ ।।
पद्धडी जव पत्त नयर-परिसरि नरेस, उल्लसिय चित्ति पुर-जण असेस । वद्धावइ के-वि नरराय-वीर, तसु दिअइ कणय-केकाण चीर ।। ५१९ जिम सरइ सुरहि निय-वच्छ-नेह, पंथिय जिम पावस-समयि गेह । जिम सरइ भसल पच्चय(?) जाइ, जिम सरइ डिंभ खुह-खिण्ण माइ ।। ५२० जिम सरइ सरोवर राजहंस, जिम सरइ पुरिसवर निय सुवंस ।। कुलवंति जेम समरइ भतार, जिम सरइ साहु संसार-पार ॥ ५२१ जिम सरइ विंझ-वण वारणिंद, जिम सरइ सुसायर पुण्ण-चंद । जिम सरइ चक्क पच्चूस-काल, जिम सरइ सुकोइल तरु रसाल ॥ ५२२ तिम समरिय नरवइ पुत्त-पेम, जल-सिंचिय जल-नालेरि जेम । अविलंब अंब-पिय-पुज्ज-पाय, लहु नमइ नेहि ललिअंग-राय ॥ ५२३ तव हरसिय निय-मणि जणणि तास, चिर जीव पुत्त तउं कोडि वास । इम दिती बहु आसीस जाम, नरवाहणि भुअ-विचि लिद्ध ताम ॥ ५२४ बिहु मिलिय महासुह कंठ-देस, आलिंगण-रंग-सुरंग-वेस । तिणि खणि सुअ-संगमि पत्त-सुक्ख, नरवाहणि पामिय जेम सुक्ख ॥ ५२५
दूहा (राग मल्हार) अगलिय-नेह-निवट्टाहं, जोअण-लक्खु वि जाउ । वरिस सएण-वि जो मिलइ, सहि सो सुक्खहँ ठाउ ।। ५२६ मेहा मोरा दादुरां० ॥५२७