Kirti Kaumudi tatha Sukrut Sankirtan

Author(s): Someshwar Mahakavi, Arisinh Thakkur Kavi,
Publisher: Singhi Jain Shastra Shiksha Pith Mumbai

Page 134

परिशिष्टम् ]
सुकृतसंकीर्तनमहाकाव्यम् । नयनाग्रवमनि परिस्फुरती, दुरितान्धकारपटली विकटाम् । दलयन्ति मे त्रिजगदीश ! कदा भवदीयपादनखदीपशिखाः ? ॥ भुवनैकनाथ ! भवदीयवपु-र्विपुलप्रभापयसि मग्नमपि । द्वितयं कदा नयनयोरिह मां, हिमहारतारगुण ! तारयति ।। तदपीयत श्रुतिपुटेन यशः, सततं विषण्णदिविषन्नदि ते । भवदङ्गदीप्तिममुना यमुना-जयिनी धयामि नयनेन कदा ? ॥ नलिनादिपुष्पनिवहेन सुरै-र्यदपूजि पादयुगमीश ! तव ।। जिन ! तेन पङ्कजनिभेन कदा, जनयामि पूजितमिवाऽऽमशिरः ॥ इति गद्गदाश्रुपुलकाकुलितः, कलयन् मनोरथमनन्यमनाः । सचिवः शिवातनयमात्तनयः, क्षणमेकमैक्षत पुरोगमिव ॥ अथ कल्पिताखिलविभातविधि-गिरिमारुरोह सह सङ्घजनैः । सचिवो जिनक्रमनखेषु पुरो-गमितेन कृष्ट इव मझु हृदा ॥ तदनु प्रमोदरभसेन रजः-प्लुतपाद एव विननाम जिनम् । अपि चैष नेत्रगमिताक्षगण-प्रसरक्षणं निभृतमीक्षितवान् । रचिताङ्गशौचविधिरिन्द्रगणैः, सहितो जिनस्नपनहेतुरथ । जिनभक्तिरागमिव मूर्तमसो, कलशेषु कुङ्कुमजलं न्यदधात् ।। अथ केऽपि भक्तिभरभासुरिताः, स्फुरिता जिनस्य पुरतः परितः । स्वयमुत्सवं विदधिरे मधुर-ध्वनिगीतिरीतिमयवाद्यलयम् ॥ वदनाप्रभागगतपाणियुग-स्थितभेरिदण्डमिषदन्तकरः । शुशुभे करीन्द्र इव मन्द्ररवः, किल कोऽपि पापतरुपातपटुः ।। अपरः पयोदरववादभव-न्निनदं मृदङ्गमपि वादितवान् । ननृते दरदुरितभोगिशतैः, कृतिनां मनोमयमयूरकुलैः ॥ अपरस्य वंशमपि वादयतो, मधुरस्वरैः प्रमदिनां कृतिनाम् । यदमीलि पक्ष्मपुटकेन रसात् , तदवेशि कर्ण इव नेत्रमृगैः ॥ अपरः पिबन्नपि शिवातनुभू-वदनेन्दुदीधितिसुधां स्थिरदृक् । भृशमुज्जगार जनयन् जनता-हृदि सम्मदं ललितगीतमिषात् ॥ चटुला नटी सरसनृत्तवशा-दिह रत्नभूषणशुभा शुशुभे । कुलदेवतेव तडितां तरला, जलदद्युतेर्जिनपतेः पुरतः ॥ इति सम्मदेन जिनमस्नपयद् , घुसृणाम्बुभिः कृतिपतिः स तथा । • कपिशो यथाऽयमपि रैवतकः किल देवताद्रिसदृशो ददृशे ॥