________________
આવો બોધ તેના કુમળા માનસમાં અંકિત કરી દેવામાં આવે તો તેનો વિપુલ લાભ ભાવિ પ્રજાને મળી શકે તેમ છે. આગળ વધીને દરેક મા-બાપ પોતાનાં નાનાં-મોટાં સંતાનોને આ ભણાવતાં પોતે પણ ભણીને આત્માર્થ સાધી શકે તેમ છે અને તેના ફળસ્વરૂપે અઢાર પાપોથી અનાયાસે દૂર રહેવાશે! આત્માર્થે જાગવાથી ઇન્દ્રિય જય સહજ અને સરળ બને છે. શ્રદ્ધાની પાછળ સંકલ્પનું બળ હોય તો સિદ્ધિ દૂર નથી. મારો સંકલ્પ’ પ્રકરણમાં લેખકની સાધક તરીકે છાપ જણાય છે.
તમારો રસ એ તમારું જીવન બની જાય છે.
તમારું આકર્ષણ એ તમારું વ્યક્તિત્વ બની જાય છે. તમારી રુચિ એ તમારી તાસીર બની જાય છે.
તમારી નજર એ તમારી અવસ્થા બની રહે છે.
આજના ભૌતિક, વિલાસી, નાસ્તિક વાતાવરણમાં આ ચારેને સુમધુર યોગ્ય વળાંક આપવા માટે પ્રસ્તુત પુસ્તક મરુભૂમિમાં કલ્પવૃક્ષની ગરજ સારશે. જો ગેયરૂપે આને કંઠસ્થ કરવામાં આવે તો ભાવવાહિતામાં સરકવાનું ખૂબ આસાન બની શકે તેમ છે અને તે માટે ડૉ. શેફાલી શાહ વગેરેનું યોગદાન ખૂબ આવકાર્ય બન્યું છે.
લેખકશ્રીએ જૂના ઢાળોનો ઉપયોગ કરીને પ્રાચીનતાના ગૌરવવંતા વૈભવને જાળવવાનો અનુકરણીય, અનુમોદનીય પ્રયત્ન કર્યો છે એવું નિઃસંકોચપણે કહી શકાય તેમ છે.
પ્રાંતે શાશ્વત નમસ્કારમંત્ર અને પ્રાયઃશાશ્વત ગિરિરાજની નતમસ્તકે વંદના કરનાર શાશ્વતના લયમાં પહોંચવાનો આયાસ બતાવી રહ્યા છે સ્વાન્તઃ સુખાય માટે રચેલું આ સર્વાન્તઃ સુખાય માટે બને એ અભ્યર્થના સાથે વિરમું છું.
માગસર વદ-૪,બુધવાર
તા.૧૦/૧૨/૨૦૧૪
લિ...નીતિસૂરિ મ.સા.ના સમુદાયના પ.પૂ.ગુરુદેવ સા.શ્રી મયૂરકલાશ્રીજી મ.સા.ના શિષ્યા સાધ્વીજી નંદિયશાશ્રીજી મ.
[ ૧૩ ]
