Bhitarno Rajipo

Author(s): Vijay Hathisingh Shah
Publisher: Vijay Hathisingh Shah

Page 42

મનની માયાજાળ (ઢાળ - વૈષ્ણવજન તો તેને રે કહીએ)
૧. મનડું તારું મર્કટ સરખું, સ્થિર ના રહે પળવાર રે,
કૂદતું અહીંતહીં સદાય ફરતું, ચંચળ તારા વિચાર રે ... મનડું
૨. સાચું ખોટું ને, તારું મારું, કરે તું વારંવાર રે,
રાજી નારાજીનાં મહોરાં, પળપળ તું ધરનાર રે .. મનડું
૩. મન પ્રેરે વિચારવા ચિત્તને, જન્મે ચિત્તમાં વૃત્તિ રે,
ફળશ્રુતિમાં ભળે પ્રવૃત્તિ, થાય નહીં નિવૃત્તિ રે.. મનડું
૪. મન કારણ બંધન મુક્તિનું, સુખને સદા તે યાચે રે,
રાગ દ્વેષની આંગળી પકડી, આર્તધ્યાનમાં રાચે રે.. મનડું
૫. મન જીત્યું તેણે જીત્યું સઘળું, જીત્યું જગત સમસ્ત રે,
અનાસક્ત થઈ રહે આનંદે, અનુભૂતિમાં મસ્ત રે.. મનડું
૬. મન આનંદે મસ્ત બને તો, શબ્દોથી ના બોલે રે,
નિજની સાથે એકમેક થઈ, નિજાનંદમાં મહાલે રે.. મનડું
૭. કહે વિજય તું નક્કી કરજે, ચિત્તવૃત્તિનો રોધ રે,
આતમયોગ થશે ત્યાં તુજને, નહીં પરનો અવરોધ રે... મનડું
ભીતરનો રાજીપો * ૪૧