________________
ಸಂಘರ್ಷಣೆಯನ್ನು ತಪ್ಪಿಸಿ
ಹೀಗೆ ಜೀವನವನ್ನು ಜೀವಿಸಬಹುದು
ಜೀವನವನ್ನು ಜೀವಿಸಲು ಯಾರಿಗೂ ಬರುವುದೇ ಇಲ್ಲ! ಮದುವೆಗೆ ಅರ್ಹರಲ್ಲದವರಿಗೂ, ಬಹಳ ಕಷ್ಟದಲ್ಲಿ ಮದುವೆಯನ್ನು ಮಾಡಿಸಲಾಯಿತು! ತಂದೆಯಾಗುವ ಅರ್ಹತೆಯಿಲ್ಲದೆ ಇದ್ದರೂ, ತಂದೆಯಾಗಿಬಿಟ್ಟಿದ್ದಾಯ್ತು! ಈಗಲಾದರೂ ಮಕ್ಕಳು ಮೆಚ್ಚುವಂತಹ ಜೀವನವನ್ನು ಜೀವಿಸಬೇಕು. ದಿನದ ಆರಂಭದಿಂದಲೇ ನಿಶ್ಚಯ ಮಾಡಬೇಕು, 'ಇವತ್ತು ಯಾರೊಂದಿಗೂ ಸಂಘರ್ಷಣೆಗೆ ಒಳಗಾಗಬಾರದು,' ಎಂದು. ಸಂಘರ್ಷಣೆಯಿಂದ ಏನು ಅನುಕೂಲವಾಗುತ್ತದೆ ಎಂದು ನನಗೆ ತೋರಿಸಿ ಹಾಗೂ ಏನು ಲಾಭವಾಗುತ್ತದೆ?
ಪ್ರಶ್ಯಕರ್ತ: ದುಃಖವೇ ಆಗಿದೆ.
ದಾದಾಶ್ರೀ: ದುಃಖವಾಗುವುದಷ್ಟೇ ಅಲ್ಲ, ಈ ಸಂಘರ್ಷಣೆಯಿಂದ ತಕ್ಷಣಕ್ಕೆ ದುಃಖವಂತೂ ಆಗುತ್ತದೆ, ನಂತರ ದಿನವೆಲ್ಲಾ ಹಾಳಾಗುತ್ತದೆ ಅಲ್ಲದೆ, ಮುಂದಿನ ಜನ್ಮದಲ್ಲಿ ಮನುಷ್ಯತ್ವವನ್ನು ಕಳೆದುಕೊಳ್ಳುವಂತಾಗುತ್ತದೆ. ಮನುಷತ್ವವು ಯಾವಾಗ ಉಳಿಯುವುದೆಂದರೆ, ಸಜ್ಜನರಾಗಿದ್ದರೆ ಮಾತ್ರ ಮನುಷ್ಯತ್ವವು ಉಳಿಯುತ್ತದೆ. ಆದರೆ, ಪಶುಗಳ ಹಾಗೆ ಹೊಡೆಯುವುದು, ಗುದ್ದಾಡುವುದು, ಹೀಗೆ ಮತ್ತೊಬ್ಬರಿಗೆ ತೊಂದರೆ ಕೊಡುತ್ತಲೇ ಇದ್ದರೆ, ನಂತರ ಮತ್ತೆ ಮನುಷ್ಯ ಜನ್ಮವು ದೊರಕುವುದೇ? ದನಗಳು-ಎಮ್ಮೆಗಳು ಕೊಂಬಿನಿಂದ ಹೊಡೆದಾಡುತ್ತವೋ ಅಥವಾ ಮನುಷ್ಯರು ಹೊಡೆದಾಡುತ್ತಾರೋ?
ಪ್ರಶ್ನಕರ್ತ: ಮನುಷ್ಯರೇ ಹೆಚ್ಚು ಹೊಡೆದಾಡುತ್ತಾರೆ.
ದಾದಾಶ್ರೀ: ಮನುಷ್ಯರು ಹೊಡೆದಾಡಿದರೆ ಮತ್ತೆ ಅವರು ಪ್ರಾಣಿ ಜನ್ಮಕ್ಕೆ ಹೋಗಬೇಕಾಗುತ್ತದೆ. ಅಲ್ಲದೆ ಎರಡು ಕಾಲಿದ್ದವರು ನಾಲ್ಕು ಕಾಲುಗಳನ್ನು ಹೊಂದುವುದರ ಜೊತೆಗೆ ಬಾಲ ಬೇರೆ! ಅಲ್ಲೇನೂ ಹೇಗೆಂದರೆ ಹಾಗೆ ಇರುವುದಾಗಿದೆಯೇ? ಅಲ್ಲಿ ಏನೂ ದುಃಖವಿಲ್ಲವೇ? ಬಹಳ ದುಃಖವಿದೆ. ಸ್ವಲ್ಪ ತಿಳಿದುಕೊಳ್ಳಬೇಕು, ಹೇಗೆಂದರೆ ಹಾಗೆ ಇದ್ದರಾಯಿತೇ?
ಸಂಘರ್ಷಣೆಯು, ನಮ್ಮದೇ ಅಜ್ಞಾನವಾಗಿದೆ
ಪ್ರಶ್ಯಕರ್ತ: ಜೀವನದಲ್ಲಿ ಸ್ವಭಾವಗಳು ಹೊಂದದಿರುವ ಕಾರಣದಿಂದ ಸಂಘರ್ಷಣೆಗಳಾಗುತ್ತವೆ ಅಲ್ಲವೇ?
ದಾದಾಶ್ರೀ: ಸಂಘರ್ಷಣೆಯಿಂದಾಗಿಯೇ ಅದನ್ನು ಸಂಸಾರವೆಂದು ಕರೆಯುವುದು.
