Agam 07 Ang 07 Upashak Dashang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 12

उपासकदसांग सूत्र
सम्मत्तस्स पंच अइयारा पेयाला जाणियव्वा, ण समायरियव्वा, तं जहा- संका, कंखा, वितिगिच्छा, परपासंडपसंसा, परपासंडसंथवो। तयाणंतरं च णं थूलगस्स पाणाइवाय-वेरमणस्स समणोवासएणं पंच अइयारा पेयाला जाणियव्वा ण समायरियव्वा, तं जहा- बंधे, वहे, छविच्छेए, अइभारे, भत्तपाणवोच्छेए । तयाणंतरं च णं थूलगस्स मुसावाय-वेरमणस्स पंच अइयारा [पेयाला] जाणियव्वा ण समायरियव्वा, तं जहा- सहसब्भक्खाणे, रहसब्भक्खाणे, सदारमंतभेए, मोसोवएसे, कुडलेहकरणे । तयाणंतरं च णं थूलगस्स अदिण्णादाणवेरमणस्स पंच अइयारा पेयाला] जाणियव्वा ण समायरियव्वा, तं जहा- तेणाहडे, तक्करप्पओगे, विरुद्धरज्जाइक्कमे, कूडतुल्लकूडमाणे, तप्पडिरूवगववहारे । तयाणंतरं च णं सदारसंतोसिए पंच अइयारा [पेयाला] जाणियव्वा, ण समायरियव्वा, तं जहा- इत्तरियपरिग्गहियागमणे, अपरिग्गहियागमणे, अणंगकीडा, परविवाहकरणे, कामभोगतिव्वाभिलासे | तयाणंतरं च णं इच्छापरिमाणस्स समणोवासएणं पंच अइयारा [पेयाला] जाणियव्वा, ण समायरियव्वा, तं जहा- खेत्त-वत्थु-पमाणाइक्कमे, हिरण्ण-सुवण्ण- पमाणाइक्कमे दुपयचउप्पय-पमाणाइक्कमे, धण-धण्ण-पमाणाइक्कमे, कुविय- पमाणाइक्कमे । तयाणंतरं च णं दिसिव्वयस्स पंच अइयारा [पेयाला] जाणियव्वा, ण समायरियव्वा, तं जहा- उड्ढदिसि पमाणाइक्कमे, अहोदिसि पमाणाइक्कमे, तिरियदिसि पमाणाइक्कमे, खेत्तवुड्ढी, सइअंतरद्धा । तयाणंतरं च णं उवभोगपरिभोगे दुविहे पण्णत्ते, तं जहा- भोयणओ य कम्मओ य। तत्थ णं भोयणओ समणोवासएणं पंच अइयारा पेयाला] जाणियव्वा ण समायरियव्वा, तं जहासचित्ताहारे, सचित्त-पडिबद्धाहारे, अपक्कोसहि-भक्खणया, दुपक्कोसहि-भक्खणया, तुच्छोसहि-भक्खणया; कम्मओ णं समणोवासएणं पण्णरस कम्मादाणाई जाणियव्वाइं, ण समायरियव्वाइं, तं जहा- इंगालकम्मे वणकम्मे, साडीकम्मे, भाडीकम्मे, फोडीकम्मे, दंतवाणिज्जे, लक्खवाणिज्जे, रसवाणिज्जे, विसवाणिज्जे, केसवाणिज्जे, जंतपीलणकम्मे, णिल्लंछणकम्मे, दवग्गिदावणया, सर-दह- तलाय-सोसणया, असइ-जण-पोसणया । तयाणंतरं च णं अणट्ठदंडवेरमणस्स समणोवासएणं पंच अइयारा पेयाला] जाणियव्वा, ण समायरियव्वा, तं जहा- कंदप्पे, कुक्कुइए, मोहरिए, संजुत्ताहिगरणे, उवभोगपरिभोगाइरित्ते।