Agam 07 Ang 07 Upashak Dashang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 29

उपासकदसांग सूत्र
२५
तए णं से चुलणीपिया समणोवासए पढम उवासगपडिमं उवसंपज्जित्ताणं विहरइ, पढमं उवासगपडिमं अहासुत्तं जहा आणंदो जाव एक्कारसमं वि । तए णं से चुलणीपिया समणोवासए तेणं उरालेणं जहा कामदेवो बहूहिं सीलव्वय-गुणवेरमण-पच्चक्खाण-पोसहोववासेहिं अप्पाणं भावेत्ता, बीसं वासाई समणोवासग-परियायं पाउणित्ता, एक्कारस य उवासग-पडिमाओ सम्म काएणं फासित्ता, मासियाए संलेहणाए अत्ताणं झूसित्ता, सहिँ भत्ताइं अणसणाए छेदेत्ता, आलोइय-पडिक्कंते, समाहिपत्ते कालमासे कालं किच्चा सोहम्मे कप्पे सोहम्मवडिंसगस्स महाविमाणस्स उत्तर-पुरत्थिमेणं अरुणप्पभे विमाणे देवत्ताए उववण्णे चत्तारि पलिओवमाइं ठिई पण्णत्ता। महाविदेहे वासे सिज्झिहिइ । णिक्खेवो जहा पढमस्स ।।
॥ तइअं अज्झयणं समत्त ||
चउत्थे अज्झयणं
सुरादेवे
उक्खेवओ चउत्थस्स अज्ज्ञयणस्स | एवं खल जंबू ! तेणं कालेणं तेणं समएणं वाणारसी णामं णयरी | कोट्ठए चेइए | जियसत्तू राया । सुरादेवे गाहावई अड्ढे जाव अपरिभूए । छ हिरण्ण-कोडीओ णिहाण-पउत्ताओ, छ ढि-पउत्ताओ, छ पवित्थर- पउत्ताओ | छ वया, दस-गो-साहस्सिएणं वएणं | धण्णा भारिया । सामी समोसढे | जहा आणंदो तहेव पडिवज्जए गिहिधम्मं । जहा कामदेवो जाव समणस्स भगवओ महावीरस्स धम्मपण्णत्तिं उवसंपज्जित्ताणं विहरइ । तए णं तस्स सुरादेवस्स समणोवासयस्स अंतिए पुव्व-रत्तावरत्तकाल-समयंसि एगे देवे पाउब्भवित्था । से देवे एगं महं णीलुप्पल जाव असिं गहाय सुरादेवं समणोवासयं एवं वयासी- हं भो सुरादेवा समणोवासया ! अपत्थिय-पत्थिया जाव जइ णं तुम सीलाई जाव ण भंजेसि, तो ते जेटुं पुत्तं साओ गिहाओ णीणेमि, णीणेत्ता तव अग्गओ घाएमि, घाएत्ता पंच सोल्लए करेमि, करेत्ता आदाणभरियंसि कडाहयंसि अद्दहेमि, अद्दहेत्ता तव गायं मंसेण य सोणिएण य आयंचामि, जहा णं तुम अट्ट-दुहट्ट वसट्टे अकाले चेव जीवियाओ ववरोविज्जसि। एवं मज्झिमयं, कणीयसं; एक्केक्के पंच सोल्लया । तहेव करेइ जहा चूलणीपियस्स, णवरं एक्केक्के पंच सोल्लया ।