Agam 07 Ang 07 Upashak Dashang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 42

उपासकदसांग सूत्र
खोभित्तए वा विपरिणामित्तए वा, ताहे संते, तंते, परितंते पोलासपुराओ णयराओ पडिणिक्खमइ, पडिणिक्खमित्ता बहिया जणवय-विहारं विहरइ । तए णं तस्स सद्दालपुत्तस्स समणोवासयस्स बहूहिं सीलजाव भावेमाणस्स चोद्दस संवच्छराई वइक्कंताई । पण्णरसमस्स संवच्छरस्स अंतरा वट्टमाणस्स अण्णया कयाई पुव्व- रत्तावरत्त-काले जाव समणस्स भगवओ महावीरस्स [अंतियं] धम्मपण्णत्तिं उवसंपज्जित्ताणं विहरइ । तए णं तस्स सद्दालपुत्तस्स समणोवासयस्स अंतियं पुव्वरत्तावरत्तकाले एगे देवे पाउब्भवित्था । तए णं से देवे एगं महं णीलुप्पल जाव खुरधारं असं गहाय सद्दालपुत्तं समणोवासयं एवं वयासी- हं भो सद्दालपत्ता समणोवासया ! एवं सव्वं उच्चारेयव्वं जाव आयंचइ। णवरं एक्केक्के पुत्ते णव मंस-सोल्लए करेइ आयंचइ । तए णं से सद्दालपुत्ते समणोवासए अभीए जाव विहरइ । तए णं से देवे सद्दालपुत्तं समणोवासयं अभीयं जाव पासित्ता चउत्थं पि सद्दालपुत्तं समणोवासयं एवं वयासी- हं भो सद्दालपत्ता समणोवासया ! अपत्थियपत्थिया जाव ण भंजेसि तओ जा इमा अग्गिमित्ता भारिया धम्म-सहाइया, धम्मबिइज्जिया, धम्माणुरागरत्ता, सम-सुह- दुक्ख-सहाइया, तं ते साओ गिहाओ णीणेमि णीणेत्ता तव अग्गओ घाएमि, घाएत्ता णव मंस-सोल्लए करेमि, करेत्ता आदाण-भरियंसि कडाहयंसि अद्दहेमि, अद्दहेत्ता तव गायं मंसेण य सोणिएण य आयंचामि, जहा णं तुम अट्ट-दुहट्टवसट्टे अकाले चेव जीवियाओ ववरोविज्जसि । तए णं से सद्दालपुत्ते समणोवासए तेणं देवेणं एवं वुत्ते समाणे अभीए जाव विहरइ । तए णं से देवे सद्दालपुत्तं समणोवासयं दोच्चपि तच्चपि एवं वयासी- हं भो ! सद्दालपुत्ता समणोवासया ! तं चेव भणइ । तए णं तस्स सद्दालपुत्तस्स समणोवासयस्स तेणं देवेणं दोच्चंपि तच्चपि एवं वुत्तस्स समाणस्स अयं अज्झत्थिए जाव समुप्पण्णे एवं जहा चुलणीपिया तहेव चिंतेइ जाव आयंचइ, जा वि य णं ममं इमा अग्गिमित्ता भारिया सम-सुह-दुक्ख सहाइया, तं पि य इच्छड़ साओ गिहाओ णीणेत्ता ममं अग्गओ घाएत्तए । तं सेयं खलु ममं एयं पुरिसं गिण्हित्तए त्ति कट्ट उद्धाइए । एवं जहा चुलणीपिया तहेव सव्वं भाणियव्वं । णवरं अग्गिमित्ता भारिया कोलाहलं सुणित्ता भणइ । अरुणभूए विमाणे उववण्णे जाव महाविदेहे वासे सिज्झिहिइ । णिक्खेवो जहा पढमस्स |