Agam 05 Ang 05 Bhagvati Vyakhya Prajnapti Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 588

भगवई सुत्त
पुलाए णं भंते ! कइ कम्मप्पगडीओ उदीरेइ ? गोयमा ! आउय-वेयणिज्जवज्जाओ छ कम्मप्पगडीओ उदीरेइ ।
बउसे णं भंते ! पुच्छा ? गोयमा ! सत्तविहउदीरए वा, अट्ठविहउदीरए वा, छव्विहउदीरए वा | सत्त उदीरेमाणे आउयवज्जाओ सत्त कम्मपगडीओ उदीरेइ । अट्ठ उदीरेमाणे पडिपुण्णाओ अट्ठ कम्मप्पगडीओ उदीरेइ । छ उदीरेमाणे आउयवेयणिज्जवज्जाओ छ कम्मप्पगडीओ उदीरेइ । पडिसेवणा कुसीले एवं चेव । कसायकुसीले णं भंते ! पुच्छा ? गोयमा ! सत्तविहउदीरए वा, अट्ठविहउदीरए वा, छव्विहउदीरए वा, पंचविहउदीरए वा | सत्त उदीरेमाणे आउयवज्जाओ सत्त कम्मप्पगडीओ उदीरेइ। अट्ट उदीरेमाणे पडिपुण्णाओ अट्ठ कम्मप्पगडीओ उदीरेइ । छ उदीरेमाणे आउय
णिज्जवज्जाओ छ कम्मप्पगडीओ उदीरेड़ | पंच उदीरेमाणे आउय-वेयणिज्ज-मोहणिज्जवज्जाओ पंच कम्मप्पगडीओ उदीरेइ । णियंठे णं भंते ! पुच्छा ? गोयमा ! पंचविहउदीरए वा, दुविहउदीरए वा । पंच उदीरेमाणे आउय- वेयणिज्ज- मोहणिज्जवज्जाओ पंच कम्मप्पगडीओ उदीरेइ, दो उदीरेमाणे णामं च गोयं च उदीरेइ। सिणाए णं भंते ! पुच्छा ? गोयमा ! दुविहउदीरए वा अणुदीरए वा | दो उदीरेमाणे णामं च गोयं च उदीरेइ । पुलाए णं भंते ! पुलायत्तं जहमाणे किं जहइ, किं उवसंपज्जइ ? गोयमा ! पुलायत्तं जहइ, कसायकुसीलं वा असंजमं वा उवसंपज्जइ । बउसे णं भंते ! बउसत्तं जहमाणे किं जहइ, किं उवसंपज्जइ ? गोयमा ! बउसत्तं जहइ, पडिसेवणाकुसीलं वा कसायकुसीलं वा असंजमं वा संजमासंजमं वा उवसंपज्जइ। पडिसेवणाकुसीले णं भंते! पुच्छा । गोयमा ! पडिसेवणाकुसीलत्तं जहइ, बउसं वा कसायकुसीलं वा असंजमं वा संजमासंजमं वा उवसंपज्जइ । कसायकुसीले णं भंते! पुच्छा ? गोयमा ! कसायकुसीलत्तं जहइ, पुलायं वा बउसं वा पडिसेवणाकुसीलं वा णियंठं वा असंजमं वा संजमासंजमं वा उवसंपज्जइ । णियंठे णं भंते ! पुच्छा ? गोयमा ! णियंठत्तं जहइ, कसायकुसीलं वा सिणायं वा असंजमं वा उवसंपज्जइ । सिणाए णं भंते ! पुच्छा ? गोयमा ! सिणायत्तं जहइ, सिद्धिगई उवसंपज्जइ । पुलाए णं भंते ! किं सण्णोवउत्ते होज्जा, णोसण्णोवउत्ते होज्जा ? गोयमा ! णोसण्णोवउत्ते होज्जा। बउसे णं भंते ! पुच्छा ? गोयमा ! सण्णोवउत्ते वा होज्जा, णोसण्णोवउत्ते वा होज्जा । एवं पडिसेवणाकुसीले वि, एवं कसायकुसीले वि । णियंठे सिणाए य जहा पुलाए | पुलाए णं भंते ! किं आहारए होज्जा, अणाहारए होज्जा ? गोयमा ! आहारए होज्जा, णो अणाहारए होज्जा | एवं जाव णियंठे ।
578