Agam 05 Ang 05 Bhagvati Vyakhya Prajnapti Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 593

भगवई सुत्त
सामाइयसंजए णं भंते ! किं पडिसेवए होज्जा, अपडिसेवए होज्जा ? गोयमा ! पडिसेवए वा होज्जा, अपडिसेवए वा होज्जा | जइ पडिसेवए होज्जा- किं मूलगुणपडिसेवए होज्जा ? गोयमा ! सेसं जहा पुलागस्स । जहा सामाइयसंजए एवं छेओवट्ठावणिए वि | परिहारविसुद्धियसंजए णं भंते ! पुच्छा ? गोयमा ! णो पडिसेवए होज्जा, अपडिसेवए होज्जा । एवं जाव अहक्खायसंजए | सामाइयसंजए णं भंते ! कइसु णाणेसु होज्जा ? गोयमा ! दोसु वा तिसु वा चउसु वा णाणेसु होज्जा । एवं जहा कसायकुसीलस्स तहेव चत्तारि णाणाई भयणाए, एवं जाव सुहमसंपराए । अहक्खायसंजयस्स पंच णाणाइं भयणाए जहा णाणुद्देसए । सामाइयसंजए णं भंते ! केवइयं सुयं अहिज्जेज्जा ? गोयमा ! जहण्णेणं अट्ठ पवयणमायाओ, एवं जहा कसायकुसीले । एवं छेओवट्ठावणिए वि । परिहारविसुद्धियसंजए णं भंते ! पुच्छा ? गोयमा ! जहण्णेणं णवमस्स पुव्वस्स तइयं आयारवत्थु, उक्कोसेणं असंपुण्णाई दस पुव्वाइं अहिज्जेज्जा । सुहुमसंपरायसंजए जहा सामाइयसंजए । अहक्खायसंजए णं भंते ! पुच्छा ? गोयमा ! जहण्णेणं अट्ठ पवयणमायाओ, उक्कोसेणं चोदस पुव्वाइं अहिज्जेज्जा, सुयवइरित्ते वा होज्जा | सामाइयसंजए णं भंते ! किं तित्थे होज्जा, अतित्थे होज्जा ? गोयमा ! तित्थे वा होज्जा, अतित्थे वा होज्जा, एवं जहा कसाय कुसीले । छेओवट्ठावणिए परिहारविसुद्धिए य जहा पुलाए, सेसा जहा सामाइयसंजए । सामाइयसंजए णं भंते ! किं सलिंगे होज्जा, अण्णलिंगे होज्जा, गिहिलिंगे होज्जा? गोयमा ! जहा पुलाए । एवं छेओवट्ठावणिए वि | सामाइयसंजए णं भंते ! कइसु सरीरेसु होज्जा ? गोयमा ! तिसु वा चउसु वा पंचसु वा जहा कसायकुसीले । एवं छेओवट्ठावणिए वि | सेसा जहा पुलाए | सामाइयसंजए णं भंते ! किं कम्मभूमीए होज्जा, अकम्मभूमीए होज्जा ? गोयमा ! जम्मणं संतिभावं पडुच्च कम्मभूमीए होज्जा, णो अकम्मभूमीए होज्जा । एवं जहा बउसे। एवं छेओवट्ठावणिए वि। परिहारविसुद्धिए य जहा पुलाए, सेसा जहा सामाइयसंजए | सामाइयसंजए णं भंते ! किं ओसप्पिणीकाले होज्जा, उस्सप्पिणीकाले होज्जा, णोओसप्पिणीणोउस्सप्पिणीकाले होज्जा ? गोयमा ! ओसप्पिणीकाले होज्जा, एवं जहा बउसे । एवं छेओवट्ठावणिए वि । णवरं जम्मणं संतिभावं पडुच्च चउसु वि पलिभागेसु णत्थि, साहरणं पडुच्च अण्णयरे पलिभागे होज्जा । सेसं तं चेव । परिहारविसुद्धिए णं भंते! पुच्छा ? गोयमा! ओसप्पिणीकाले वा होज्जा, उस्सप्पिणी-काले वा होज्जा, णोओसप्पिणी-णोउस्सप्पिणीकाले णो होज्जा। जइ ओसप्पिणीकाले होज्जा-जहा पुलाओ। उस्सप्पिणीकाले वि जहा पुलाओ। सुहुमसंपराइओ जहा णियंठो। एवं अहक्खाओ वि।
२८
583