Agam 05 Ang 05 Bhagvati Vyakhya Prajnapti Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 603

भगवई सुत्त
से किं तं भंते! अप्पसत्थवइविणए ? गोयमा ! अप्पसत्थवइविणए सत्तविहे पण्णत्ते, तं जहा- पावए, सावज्जे जा भयाभिसंकणे । से तं अप्पसत्थवइविणए । से तं वइविणए । से किं तं भंते! कायविणए ? गोयमा ! कायविणए दुविहे पण्णत्ते, तं जहा- पसत्थकायविणए य, अप्पसत्थकायविणए य ।
से किं तं भंते ! पसत्थकायविणए ? गोयमा ! पसत्थकायविणए सत्तविहे पण्णत्ते, तं जहाआउत्तं गमणं, आउत्तं ठाणं, आउत्तं णिसीयणं, आउत्तं तयट्टणं, आउत्तं उल्लंघणं, आउत्तं पल्लंघणं, आउत्तं सव्विंदियजोगजुंजणया । से तं पसत्थकायविणए | से किं तं भंते! अप्पसत्थकायविणए ? गोयमा ! अप्पसत्थकायविणए सत्तविहे पण्णत्ते, तं जहा- अणाउत्तं गमणं जाव अणाउत्तं सव्विंदिय
। से तं अप्पसत्थ- कायविणए। से तं कायविणए। से किं तं भंते ! लोगोवयारविणए ? गोयमा ! लोगोवयारविणए सत्तविहे पण्णत्ते, तं जहाअब्भासवत्तियं, परच्छंदाणुवत्तियं, कज्जहेउं, कयपडिकइया, अत्तगवेसणया, देसकालण्णया, सव्वत्थेसु अप्पडिलोमया । से तं लोगोवयारविणए । से तं विणए । से किं तं भंते ! वेयावच्चे ? गोयमा ! वेयावच्चे दसविहे पण्णत्ते, तं जहा- आयरियवेयावच्चे, उवज्झायवेयावच्चे, थेरवेयावच्चे, तवस्सिवेयावच्चे, गिलाणवेयावच्चे, सेहवेयावच्चे, कुलवेयावच्चे, गणवेयावच्चे, संघवेयावेच्चे, साहम्मियवेयावच्चे । से तं वेयावच्चे । से किं तं भंते ! सज्झाए ? गोयमा ! सज्झाए पंचविहे पण्णत्ते, तं जहा- वायणा, पडिपुच्छणा, परियट्टणा, अणुप्पेहा, धम्मकहा । से तं सज्झाए । से किं तं भंते ! झाणे ? गोयमा ! झाणे चउव्विहे पण्णत्ते, तं जहा- अद्दे झाणे, रोद्दे झाणे,
धम्मे झाणे, सुक्के झाणे | १४८ अट्टे झाणे चउव्विहे पण्णत्ते, तं जहा- अमणुण्णसंपओगसंपत्ते तस्स विप्पओग
सइसमण्णागए यावि भवइ, मणुण्णसंपओगसंपत्ते तस्स अविप्पओगसइसमण्णागए यावि भवइ, आयंकसंपओगसंपउत्ते तस्स विप्पओगसइसमण्णागए यावि भवइ, परिजसियकामभोगसंपओगसंपउत्ते तस्स अविप्पओगसइसमण्णागए यावि भवइ । अट्टस्स य झाणस्स
चत्तारि लक्खणा पण्णत्ता, तं जहा- कंदणया, सोयणया, तिप्पणया, परिदेवणया | १४९ रोद्दे झाणे चउव्विहे पण्णत्ते, तं जहा- हिंसाणुबंधी, मोसाणुबंधी, तेयाणुबंधी,
सारक्खणाणु- बंधी। रोदस्स णं झाणस्स चत्तारि लक्खणा पण्णत्ता, तं जहा- ओस्सण्णदोसे, बहुलदोसे, अण्णाणदोसे, आमरणांतदोसे। धम्मे झाणे चउव्विहे चउप्पडोयारे पण्णत्ते, तं जहा- आणाविजए, अवायविजए विवागविजए, संठाणविजए । धम्मस्स णं झाणस्स चत्तारि लक्खणा पण्णत्ता, तं जहा- आणारुई, णिस्सगरुई, सुत्तरुई, ओगाढरुई । धम्मस्स णं झाणस्स चत्तारि आलंबणा पण्णत्ता, तं जहा- वायणा, पडिपुच्छणा, परियट्टणा, धम्मकहा। धम्मस्स णं झाणस्स चत्तारि अणुप्पेहाओ पण्णत्ताओ, तं जहा- एगत्ताणुप्पेहा, अणिच्चाणुप्पेहा, असरणाणुप्पेहा, संसाराणुप्पेहा ।
593