Aatmanushasan

Author(s): Gunbhadraswami
Publisher: Shrimad Rajchandra Ashram

Page 9

મોહ-મમતા નિર્મળ કરી, વિષય-કષાયથી નિવર્તીિ આત્મસન્મુખ થવાનો બોધ આપનાર “આત્માનુશાસન' ગ્રંથ એક ઉત્તમ વૈરાગ્યપ્રધાન અધ્યાત્મશાસ્ત્ર છે. શબ્દકશલ્ય સાથે અર્થગાંભીર્ય, વિવિધ મનોહર છંદો એવમ્ અલંકારોનો સુંદર ઉપયોગ તથા લાલિત્યયુક્ત હૃદયંગમ શૈલીથી સમૃદ્ધ એવો આ ગ્રંથ આદિથી અંત સુધી આત્મહિતનો ઉપદેશ આપી પોતાનું નામ ચરિતાર્થ કરે છે. પરમકૃપાળુદેવને આ ગ્રંથ પ્રત્યે ખૂબ માન હતું. તેઓશ્રી યોગ્ય આત્માઓને આ ગ્રંથના અધ્યયન-મનનની વારંવાર ભલામણ કરતા હતા, જે આ સંકલનમાં હવે પછી અપાયેલ તેઓશ્રીનાં વચનો પરથી સુપેરે જોઈ શકાય છે.
પ્રસ્તુત સંકલનના મુદ્રણ-ઉપક્રમ અર્થે શ્રીમદ્ રાજચંદ્ર આશ્રમ, અગાસ તથા શ્રી દિગંબર જૈન સ્વાધ્યાયમંદિર ટ્રસ્ટ, સોનગઢ દ્વારા પ્રકાશિત “આત્માનુશાસન' ગ્રંથનો આધાર લેવામાં આવ્યો છે, જે અર્થે પ્રકાશક સંસ્થાઓ તેમજ અનુવાદક મહાનુભાવોના ઋણનો સ્વીકાર કરીએ છીએ. આ ગ્રંથ પ્રગટ કરવાના સત્કાર્યમાં ભક્તિસભર યોગદાન આપનાર ડૉ. અતુલભાઈ શાહ, કુમારી માયા મહેતા, શ્રીમતી જ્યોતિબેન શાહ, શ્રીમતી લીનાબેન ગાલા, શ્રી પ્રમેશભાઈ શાહ આદિ સર્વ મુમુક્ષુઓને અત્રે અંતઃકરણપૂર્વક ધન્યવાદ પાઠવીએ છીએ.
ભવ્યાત્માઓને સંસારપરિણામથી પાછા વાળી ઉપશમભાવમાં સ્થિતિ કરાવનાર આ અનુપમ શિક્ષામંથને આત્મકલ્યાણના આ વિશિષ્ટ અવસરે રજૂ કરતાં અમે આનંદ અનુભવીએ છીએ. એનું ભાવપૂર્વક અધ્યયન તથા તજ્જન્ય બોધની સૂક્ષ્મ વિચારણા સાધકને અદ્ભુત વૈરાગ્ય, અપૂર્વ જાગૃતિ અને અવ્યાબાધ આત્મદશાથી અલંકૃત કરશે. જ્ઞાની મહાત્માઓની અનુભવમૂલક આર્ષ વાણીનો યથાર્થ લાભ લઈ સહુ આત્માર્થી જીવો અધ્યાત્મસાધનામાં આગળ વધે અને આત્માનુશાસનને સાકાર કરે એ જ
ભાવના.