Suyam Me Aausam

Author(s): Jitendra B Shah
Publisher: Shrutratnakar

Page 6

પ્રકાશકીય
ચરમ શાસનનાયક તીર્થંકર પરમાત્મા મહાવીર સ્વામીની દેશના જગતના જીવોનું કલ્યાણ કરનારી છે. તેમની વાણી સાંભળી અનેક જીવો ત્રિવિધ તાપથી મુક્ત થઈ શાશ્વત આત્મિક આનંદને પામ્યા છે. આવી ત્રિવિધ તાપહારિણી વાણીને ઝીલી સૂત્રબદ્ધ કરવાનું કાર્ય ગણધર ભગવંતોએ કર્યું છે. સૂત્રબદ્ધ થયેલી વાણી આગમ રૂપે પ્રસિદ્ધ છે. આગમોની સંખ્યા ૪૫ છે. મૂળ આગમો અર્ધમાગધીપ્રાકૃતમાં લખાયાં છે. આજે તો આ ભાષા દુર્ગમ બની છે. પરંતુ એક કાળે આ જ ભાષા લોકભાષા રૂપે સુપ્રસિદ્ધ હતી પરમાત્માએ સર્વ જીવોનું કલ્યાણ થાય તે માટે પંડિતોની ભાષાને ઉપદેશનું માધ્યમ ન બનાવતા લોકભાષાને જ દેશનાનું માધ્યમ બનાવી અનન્ય ઉપકાર કર્યો છે.
પ્રત્યેક આગમની શરૂઆતનાં પદો સુયં મે આઉસં !થી થાય છે. એટલે કે હે આયુષ્યમાન્ શિષ્ય ! મેં ભગવત્ પાસેથી આવું સાંભળ્યું છે તે તમે સાંભળો ! આ વાક્યમાં પરમાત્મા પ્રત્યે ભક્તિ અને દેશનામાં અનન્ય શ્રદ્ધા જણાઇ આવે છે. આથી જ આ પવિત્ર શબ્દોને ગ્રંથના શીર્ષક તરીકે પસંદ કર્યા છે. મૂળ તો આ શબ્દો જિનવાણીને જ ઇંગિત કરે છે.
જિનવાણી આગમોમાં સૂત્રાત્મક શૈલીમાં રજૂ થયેલી છે. સૂત્ર અર્થગંભીર છે. અને છતાંય તે બધાં જ વચનો આત્મકલ્યાણના અનન્ય ઉપાય સ્વરૂપ છે. આ વચનોમાંથી કેટલાંક જિનવચનોનું ચયન કરી અહીં પ્રકાશિત કરવામાં આવ્યાં છે. અહીં સંગ્રહિત