________________
માગે છે તો કેન્દ્રમાં ‘સ્વ’ના સ્થાને ‘અન્ય’ને કે ‘સર્વ’ને, ગુણીને કે નિર્ગુણીને, કમજોરને કે બહાદુરને મૂકી જો. જે પરિણામ તને અભવવા મળશે એ તારી કલ્પના બહારનું હશે.
શું કહું તને ?
તું પ્રકૃતિપ્રેમી છે ને ? આખી ય પ્રવૃત્તિમાં તને એક જ ચીજ જોવા મળશે, પરોપકાર ! સૂર્ય પ્રકાશ આપે છે, વાદળ જળ આપે છે, પુષ્પ સુવાસ આપે છે, વૃક્ષ ફળ આપે છે, નદી પાણી આપે છે, આકાશ જગા આપે છે, ખેતર પાક આપે છે, ચંદન શીતળતા આપે છે, અને તું ? તારા સુખ માટે બીજાને ત્રાસ આપે છે ! તારી શાંતિ માટે બીજાની શાંતિ ઝૂંટવતો રહે છે ! તારી પ્રસન્નતા માટે અન્યની પ્રસન્નતા ખંડિત કરતો રહે છે ! માર ન ખાય તો બીજું થાય શું?
અભિગમ બદલી નાખ. પ્રભુને તારા માટે પ્રાર્થના કરવાનું મન થઈ જાય એવી વૃત્તિનો તું સ્વામી બની જા. તારી ઉપસ્થિતિમાત્રથી વાતાવરણમાં તાજગી પ્રસરી જાય એવી વિચારશૈલી અને જીવનશૈલીનો તું સ્વામી બની જા. પછી તારે મારી પાસે આવો પ્રશ્ન લઈને આવવું નહીં પડે !
