________________
તું પૂછીશ, સંબંધ અને સંપર્કમાં શું ફરક છે ? બહુ મોટો ફરક છે. વ્યક્તિઓને દૂધમાં ભળી જતાં પાણીની જેમ મળવું એ છે સંબંધ અને તેલ પર પાણીની જેમ મળતા રહેવું એનું નામ છે સંપર્ક.
તું પૂછીશ, શું ફરક છે સંતોષ અને સામગ્રી વચ્ચે ? બહુ મોટો ફરક છે. સંતોષ એ અંદરથી અનુભવાતો આનંદ છે અને સામગ્રી એ બહારથી મળતું સુખ છે.
ટૂંકમાં, સંવેદના, સંબંધ અને સંતોષ એ ત્રણેયનું પોત છે કૂવામાંનાં પાણી જેવું જ્યારે વેદના, સંપર્ક અને સામગ્રી એ ત્રણેયનું પોત છે હોજમાંનાં પાણી જેવું. કૂવામાં પાણી નીચેથી આવે છે જ્યારે હોજમાં પાણી ઉપરથી નાખવું પડે છે.
દુઃખદ આશ્ચર્ય તો એ થાય છે કે તું નામ ‘પ્રેમ’ નું લઈને બેઠો છે અને જીવનમાં પ્રેમની સ્મશાનયાત્રા કાઢીને બેઠો છે ! સ્વસ્થ-મસ્ત અને પ્રસન્ન બન્યા રહેવું છે ? એક કામ કર. સંપત્તિને, સફળતાને અને બુદ્ધિને બહુ વજન આપવાનું બંધ કરી દે. જોજે, પરિણામ કેવું ચમત્કારિક આવીને ઊભું રહે છે ?
