________________
મહારાજ સાહેબ,
સમજાતું તો એ નથી કે ‘નજીકવાળાની ઉપેક્ષા અને દૂરવાળા પર પ્રેમ’ મનનું આવું વલણ કેમ બની ગયું છે મારું ? નજીકવાળાનો અતિ પરિચય એ આમાં કારણ હોઈ શકે ખરું ? નજીકવાળા પ્રત્યે મારી વધુ પડતી અપેક્ષા એ પરિબળ આમાં જવાબદાર હોઈ શકે ખરું? કશું જ સમજાતું નથી.
વિક્રાન્ત,
એમ તો પૈસા સાથેય તારો અતિ પરિચય છે જ ને? એના પ્રત્યે તારા મનમાં ક્યારેય નારાજગી ઉત્પન્ન થઈ ખરી? એમ તો શરીર સાથેનો તારો પરિચય પણ ગાઢ જ છે ને? તારા મનમાં એના પ્રત્યે ક્યારેય વૈરાગ્યભાવ ઉત્પન્ન થયો ખરો? એમ તો મારી સાથે પણ તારે વરસોનો પરિચય છે જ ને ? મારા પ્રત્યે તારા મનમાં દુર્ભાવ ઉત્પન્ન થયો ખરો ?
એમ તો પૈસા માટે અને શરીર માટે ય તારા મનમાં જાતજાતની અપેક્ષાઓ હોય જ છે ને? એ ન સંતોષાતા તું એમનાથી વિમુખ થઈ ગયો ખરો? મારા પ્રત્યેની તારી અપેક્ષા પૂર્ણ ન થતાં તું 'મારાથી દૂર થઈ ગયો ખરો?
