Sadhutanu Shikhar Ane Manavtani Mahek

Author(s): Harshad Doshi
Publisher: Jain Academy

Page 7

— આગમદિવાકર પૂ. જનકમુનિજીના ભાવોદ્ગાર D હૃદયભાવ
સૌરાષ્ટ્રની ધરતીનું એક પાણીદાર મોતી, મારા ગુરુબંધુ, પરમ આદરણીય, શ્રી જયંતમુનિજીના જન્મસ્થાન દલખાણિયા અને પરમ આદરણીય તપસ્વીજી મહારાજનું નામ મારા પૂર્વાશ્રમથી સાંભળતો આવ્યો છું. તેમના સમગ્ર પરિવારમાં જે ત્યાગ, તપ અને ઉચ્ચ કોટીની સાધના છે તે આ સંસારમાં ભાગ્યે જ કોઈ જીવાત્માને પ્રાપ્ત થાય છે. આ સૌભાગ્ય શાસનદેવની કૃપાનું પરિણામ છે.
હું બાળવયનો હતો ત્યારે શ્રી જયંતમુનિજીએ ગુરુદેવ પૂ. પ્રાણગુરુ પાસે દીક્ષા લીધી હતી. વડીલ ગુરુભાઈ તરીકેનો તેમનો વાત્સલ્યભાવ આજ દિવસ સુધી વરસી રહ્યો છે. આનંદની પળોમાં મને ‘રાજા મહારાજ' તરીકે સંબોધે છે ત્યારે મને પ્રસન્નતા સાથે ક્ષોભની લાગણી વર્તાય છે.
પૂ. જયંતમુનિના આમંત્રણથી હું પેટરબાર ગયો ત્યારે-પ્રવાસમાં આવતા દરેક ગામમાં તેમણે ઉત્સવનું વાતાવરણ સર્જ્યું હતું. પેટરબારના પ્રવેશ સમયે સ્વયં મારું સ્વાગત કરવા સામેથી પધાર્યા હતા. સાથે આદિવાસીઓ મોટી સંખ્યામાં નૃત્ય કરતા કરતા આવ્યા અને કોઈ રાજવી જેવું મારું સામૈયું કર્યું ત્યારે હું ભાવવિભોર થઈ ગયો. સાથે સાથે મને ગુરુદેવના આ વિસ્તારમાં ચાલી રહેલા સેવાના કાર્યની ઝાંખી જોવા મળી. રામ-ભરતના મિલન જેવું આ સ્વાગત હું કદી પણ ભૂલી શકું તેમ નથી.
તેમનું સંસ્કૃત, પ્રાકૃત, વ્યાકરણ, ન્યાય અને દર્શનશાસ્ત્રનું જ્ઞાન વિરલ છે. તેમની તેજસ્વિતા, પ્રતાપ, માનવસેવા અને કરુણાસભર જીવનદર્શન અનેક મુમુક્ષુઓના જીવનપથને ઉજ્વળ બનાવશે તે નિર્વિવાદ છે. તેમનું જીવન સમગ્ર માનવજીવનને સન્માર્ગ ઉપર લઈ જનારું ભાથું છે.
તેઓશ્રી છેલ્લાં પચાસ વર્ષોથી બિહાર-ઝારખંડમાં માનવકલ્યાણનો અનેકવિધ સેવાયજ્ઞ કરી રહ્યા છે. એવું કોઈ ક્ષેત્ર નથી જ્યાં તેમની કરુણાદૃષ્ટિ પહોંચી ન હોય. કુદરતી આફત વખતે તેઓ દિન-રાત ઊભા રહ્યા છે. મને તેમના કાર્યની વિગત મળતી રહી છે અને ક્યારેક તેનો સાક્ષી પણ રહ્યો છું.
અઢી હજાર વર્ષની જૈનધર્મની તેજોમય પરંપરામાં જે કોઈ વિરલ વિભૂતિઓએ હૃદયનાં અમી સીંચ્યાં છે તેમાં શ્રી જયંતમુનિ એક છે. તેમનું જીવનચરિત્ર માનવજીવનનાં ઉમદા મૂલ્યો પ્રસ્થાપિત કરવામાં અને જૈન સહિત સમગ્ર માનવજાતને પ્રેરણા આપશે એમ હું પૂરી શ્રદ્ધાથી કહી શકું છું. આ મહામાનવ સદેહે આપણી વચ્ચે છે ત્યારે તેમના જીવનચરિત્રને શબ્દરૂપ આપવામાં શ્રમ અને સહયોગ આપનાર દરેકને મારા કોટી કોટી ધન્યવાદ. મને વડીલ ગુરુબંધુનો જે નિર્વ્યાજ સ્નેહ મળ્યો છે તે જન્મજન્માંતર મળતો રહે એવી પૂ. ગુરુદેવ અને શાસનદેવને પ્રાર્થના કરી વિરમું છું. ફાગણ વદ સાતમ, સંવત ૨૦૬૨, બુધવાર
- જનકમુનિ
(તા. ૨૨-૩-૨૦૦૬), બગસરા
VI