Nandan Jivan Saurabh

Author(s): Nandighoshvijay, Jinvsenvijay
Publisher: Vijaynandansuri Smarak Trust

Page 4

પ્રાસંગિક સ્પૃહણીયચરિત, ઉદારચેતા અને સ્વનામધન્ય સંઘનાયક આચાર્ય ભગવંત શ્રીવિજયનંદનસૂરીશ્વરજી મહારાજનું આ જન્મશતાબ્દી વર્ષ છે. વિ.સં. ૧૯૫૫ના કાર્તક શુદિ ૧૧ના પ્રારંભાયેલી જીવનયાત્રા વિ.સં ૨૦૩૨માં સમાપ્ત ભલે થઈ; પરંતુ જો તે અટક્યા વિના ચાલી હોત તો આજે ૧૦૦ વર્ષની હોત, એવી એક સુમધુર કલ્પના, એ જન્મશતાબ્દી ઉજવવા માટેનું નિમિત્ત છે.
અગાઉ એક આવા જ પ્રસંગે કહેલી વાત દોહરાવું : જન્મ તો શ્રીજિનેશ્વરદેવનો જ પ્રશસ્ત હોય છે. અન્ય કોઈનો નહિ. છતાં આવા શાસનધોરી પૂજ્ય પુરુષની જન્મશતાબ્દી ઉજવવી, તેમાં ઔચિત્ય એટલું જ કે આવા નિમિત્તે આવા ઉત્તમપુરુષના ગુણગાન થશે. પરમાત્માની શક્ય ભક્તિ થશે. સંઘ-શાસનને લાભદાયક અને વૈયક્તિક રીતે ઉપકારક એવાં કાર્યો થશે, અને એ બધાં દ્વારા પુણ્યાનુબંધિપુણ્યના શક્ય ઉપાર્જન દ્વારા કર્મક્ષયની દિશામાં જ એકાદ ડગલું આગળ વધાશે, તો આ પ્રયોજન તે રીતે ને તે અંશે સાર્થક બનશે; અને આત્મવિકાસના પંથે પા પા પગલી ભરતાં બાળજીવોને ધર્મપ્રેરણા મળશે તે તો નફામાં જ.
વિચારભેદ, માન્યતાભેદ કે આચરણાભેદ ધરાવનાર પ્રત્યે પણ સમભાવ સભર સૌહાર્દ, અને છતાં પોતાની શુદ્ધ-સમજ્જવલ પરંપરા પ્રત્યે અચલ નિષ્ઠા એ આ પૂજ્ય પુરુષનું સહજ સુંદર આંતરરૂપ હતું.
તો પોતાના દોષદર્શનમાં રાચનાર કે અવર્ણવાદ કરનાર પ્રત્યે પણ ઉચિત ઉદારતા. સમભાવ અને ઉપકારવૃત્તિ - આ પણ તેમના સ્વભાવની એક અનન્ય લાક્ષણિક્તા હતી.
એમની આવી કેટલીક વિશેષતાઓનું નિદર્શન કરાવતાં થોડાંક લખાણોનું આ લઘુપુસ્તિકામાં સંચયન, વિદ્વાન મુનિરાજ શ્રીનંદીઘોષવિજયજી તથા મુનિરાજ શ્રીજિનસેનવિજયજી દ્વારા થયું છે. આ સંચય દ્વારા પૂજ્યશ્રીના બાહ્યાંતર ઉત્તમ સણોનો એક આછેરો આલેખ મળી રહેશે તેવી શ્રદ્ધા છે. વિ. સં. ૨૦૫૫
- વિજયશીલચન્દ્રસૂરિ કાર્તિક શુદિ ૧૧ વલસાડ