Agam 04 Ang 04 Samvayang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 16

समवायांग सूत्र मंदरे णं पव्वए मूले दस जोयणसहस्साइं विक्खभेणं पण्णत्ते । __ अरिहा णं अरिद्वणेमी दस धणूई उड्ढं उच्चत्तेणं होत्था । कण्हे णं वासुदेवे दस धणूइं उड्ढं
उच्चत्तेणं होत्था | रामे णं बलदेवे दस धणूई उड्ढं उच्चत्तेणं होत्था । दस णक्खत्ता णाणवुढिकरा पण्णत्ता, तं जहामिगसिर अद्दा पुस्सो, तिण्णि य पुव्वा य मूलमस्सेसा | हत्थो चित्तो य तहा, दस वुढिकराई णाणस्स || अकम्मभूमियाणं मणुआणं दसविहा रुक्खा उवभोगत्ताए उवत्थिया पण्णत्ता, तं जहामत्तंगया य भिंगा, तुडिअंगा दीव जोइ चित्तंगा । चित्तरसा मणिअंगा, गेहागारा अणिगिणा य ॥१॥
चउत्थीए पुढवीए दस णिरयावाससयसहस्साइं पण्णत्ताइं । इमीसे णं रयणप्पभाए पुढवीए णेरइयाणं जहण्णेणं दस वाससहस्साइं ठिई पण्णत्ता | इमीसे णं रयणप्पभाए पुढवीए अत्थेगइयाणं णेरइयाणं दस पलिओवमाइं ठिई पण्णत्ता | चउत्थीए पुढवीए णेरइयाणं उक्कोसेणं दस सागरोवमाइं ठिई पण्णत्ता | पंचमीए पुढवीए णेरइयाणं जहण्णेणं दस सागरोवमाइं ठिई पण्णत्ता । असुरकुमाराणं देवाणं जहण्णेणं दस वाससहस्साइं ठिई पण्णत्ता । असुरिंदवज्जियाणं भोमिज्जाणं देवाणं जहण्णेणं दस वाससहस्साइं ठिई पण्णत्ता। असुरकुमाराणं देवाणं अत्थेगइयाणं दस पलिओवमाइं ठिई पण्णत्ता। बायरवणस्सइकाइयाणं उक्कोसेणं दस वाससहस्साई ठिई पण्णत्ता | वाणमंतराणं देवाणं जहण्णेणं दस वाससहस्साई ठिई पण्णत्ता । सोहम्मीसाणेसु कप्पेसु अत्थेगइयाणं देवाणं दस पलिओवमाइं ठिई पण्णत्ता। बंभलोए कप्पे देवाणं उक्कोसेणं दस सागरोवमाइं ठिई पण्णत्ता । लंतए कप्पे देवाणं जहण्णेणं दस सागरोवमाइं ठिई पण्णत्ता । जे देवा घोसं सुघोसं महाघोसं णंदिघोसं सुसरं मणोरमं रम्मं रम्मगं रमणिज्जं मंगलावत्तं बंभलोगवडिंसगं विमाणं देवत्ताए उववण्णा तेसिं णं देवाणं उक्कोसेणं दस सागरोवमाइं ठिई पण्णत्ता | ते णं देवा दसण्हं अद्धमासाणं आणमंति वा, पाणमंति वा, ऊससंति वा, णीससंति वा, तेसिं णं देवाणं दसहिं वाससहस्सेहिं आहारट्टे समुप्पज्जइ । संतेगइया भवसिद्धिया जीवा जे दसहिं भवग्गहणेहिं सिज्झिसंति बुज्झिस्संति मुच्चिस्संति परिणिव्वाइस्संति सव्वदुक्खाणमंतं करिस्संति ।
10