Vinshati Vinshika Sarth

Author(s): Haribhadrasuri, Kantivijay, Hembhushanvijay, Chandrabhushanvijay
Publisher: Paramshreddhay Prakashan

Page 9

પ્રસ્તુત પ્રકાશન-સંપાદનમાં સંપાદક મુનિવરે મૂળ પાઠ શુદ્ધિ, સંસ્કૃત છાયા શુદ્ધિ પર સવિશેષ ધ્યાન આપેલ છે. તેમજ ગુજરાતી ભાવાર્થના મુદ્રણને વધુ સુંદર સ્વરૂપ આપવાનો પ્રયત્ન કર્યો છે. એથી આ પુસ્તક “વિંશતિ-વિંશિકા'ના પઠનપાઠન માટે અત્યુપયોગી અને અત્યુપકારક બની રહેશે.
| વિંશતિવિંશિકામાં જેમ વિદ્વદભોગ્ય અનેક વિષયો વિવેચિત છે, એમ સામાન્ય જિજ્ઞાસુઓને માટેય ઉપકારક બની શકે, એવા પણ ઠીકઠીક વિષયો આવરી લેવાયા છે, એની પર એક વિહંગાવલોકન કરી લઈએ.
સાતમી વિંશિકામાં દાનધર્મ વિષયક વિવેચનમાં જ્ઞાનદાન, અભયદાન, સુપાત્રદાનનું સ્વરૂપ શું ? અને આના અધિકારી કોણ ? એની વિવેચના ઉપરાંત અનુકંપાદાનની કર્તવ્યતા પણ સમજાવવામાં આવી છે.
- આઠમી વિંશિકામાં જિનપૂજા વિવેચિત છે. સમંતભદ્રા - સર્વમંગલા – સર્વસિદ્ધિફલા પૂજાનું આમૂલચૂલ સ્વરૂપ દર્શન કરાવાયું છે.
નવમી વિંશિકામાં શ્રાવકધર્મ દર્શાવીને દશમી વિશિંકામાં શ્રાવકની ૧૧ પ્રતિમાઓ વિસ્તારથી વિવેચિત છે.
અગિયારથી ચૌદમી વિંશિકાઓ સાધુ જીવન, ગોચરી સંબંધિત દોષો, ભિક્ષા શુદ્ધિના ઉપાયો સંબંધિત છે.
૧૫ અને ૧૬મી વિંશિકા આલોચના અને પ્રાયશ્ચિત પર પ્રકાશ પાથરનારી છે.
૧૭મી વિંશિકામાં યોગ, યોગના પાંચ ભેદ વગેરે વિષયોની વિસ્તૃત વિચારણા કરાઈ છે.
૧૮મી વિંશિકામાં કેવલ જ્ઞાનનો વિષય વિવેચિત છે. ૧૯ અને ૨૦મી વિંશિકામાં સિદ્ધના ૧૫ ભેદો તથા સ્ત્રીને કેવળજ્ઞાન અને મુક્તિ તેમજ સિદ્ધિ-સુખની તર્કથી અકાઢ્ય સિદ્ધિ કરવા પૂર્વક પ્રકરણ ગ્રંથની સમાપ્તિ કરવામાં આવી છે.
વિવિધ વિષયોથી સમૃદ્ધ અને સભર વિંશતિ-વિંશિકા પ્રકરણ ખરેખર એક પઠનીય પ્રકરણ છે. પાઠકો માટે આ ગ્રંથ – દ્વારના પ્રવેશક તરીકે પ્રસ્તુત પ્રકાશન જરૂર ઉપયોગી અને ઉપકારી નીવડશે.
મહા સુદ એકમાં ૩૧-૧-૨૦૧૪
આચાર્ય વિજય પૂર્ણચંદ્ર સૂરિ પ્રવચન શ્રુત-તીર્થ-શંખેશ્વર