Jain Adarsh Prasango Part 08

Author(s): Bhadreshvarvijay
Publisher: Bhadreshvarvijay

Page 4

અંતરની વાત
“સાહેબજી ! પ્રસંગોના ૭ ભાગ વાંચ્યા. ખૂબ ગમ્યો, આઠમો બહાર પડયો ?” આવું કેટલાક ઘણા વખતથી પૂછતા હતા. સાત ભાગ વાંચી ધાર્મિક ઘણી પ્રેરણા મળી એવું ઘણાના સ્વમુખે સાંભળી મને પણ ૮ મો લખવાની ઘણા વખતથી ભાવના હતી. તે ત્રણ વર્ષે વાચકો સમક્ષ રજૂ કરુ છું. આમાં કેટલાક પ્રસંગો તો મને પોતાને જ્યારે સાંભળવા મળ્યા ત્યારે મેં પણ અવર્ણનીય આનંદ અનુભવેલો ! તમને પણ હર્ષ થશે. નવકારની સમર્પિત સાધનાથી પ્રગટેલી આત્મિક વિશિષ્ટ શક્તિઓ, શોખીન યુવતીને ઉપધાનથી દીક્ષાની પ્રાપ્તિ, દુઃખોની વણજાર વચ્ચે મેઘજીભાઈએ મરતા મેળવેલી સમાધિ વગેરે ઘણા બધા વિવિધ વિષયના અદ્ભૂત પ્રસંગો વાંચતા તમને પણ ધર્મશ્રધ્ધા, અનેરો આનંદ, અનુમોદના, અરિહંતોએ ઉપદેશેલી સર્વશ્રેષ્ઠ ધર્મક્રિયાઓની પ્રચંડ તાકાતનું જ્ઞાન વગેરે ઘણું બધુ મળશે.
ઘણા ધર્મીઓએ ઢગલાબંધ પ્રસંગો મોકલ્યા છે. આભાર. એમાંથી મને જે આધારભૂત, પ્રેરક લાગ્યા તેને મેં મારી કલમે લખ્યા છે. આ આઠ ભાગમાં અન્યોએ મોકલેલ બધા પ્રસંગોની જાત તપાસ કરી શક્યો નથી. તેથી ક્યાંક હકીકત દોષ વગેરે થઈ ગયા હોય તો ક્ષમા માંગુ છું. ધર્મપ્રેમીઓને સૂચન કે પ્રેરક પ્રસંગો તમે મને આધાર ભૂત, વિગતવાર, સત્ય, પૂરી હકીકતો સાથે મોકલી સ્વપરહિત કરો. મારું ધ્યેય એક જ છે કે આજના વિલાસી વાતાવરણમાં પુણ્યોદયે જૈન કુળ પામેલા તમે આ વર્તમાન પ્રસંગો વાંચી કેવી અદ્ભુત આરાધના જૈનો કરે છે, હજારો આજે પણ ધર્મના પ્રભાવે ચમત્કારો અનુભવ છે વગેરે જાણી ધર્મશ્રધ્ધા, અનુમોદના, ધર્મવૃધ્ધિ વગેરેથી આત્મહિત સાધી આ દુર્લભ માનવ ભવને સફળ કરો.
૨
X