Chitta Samadhi Jain Yog

Author(s): Tulsi Acharya, Mahapragna Acharya
Publisher: Jain Vishva Bharati

Page 280

प्रश्नव्याकरण
२६६
एवमसंसत्तवासवसहीसमितिजोगेण भावितो भवति अंतरप्पा, आरतमणविरयगामधम्मे जितेंदिए बंभचेरगुत्ते ॥
प्र० ६७ बितियं-नारीजणस्स मज्झे न कहेयव्वा कहा-विचित्ता विब्बोय-विलास-संपउत्ता हास-सिंगार-लोइयकह व्व मोहजणणी, न आवाह-विवाह-वरकहा, इत्थीणं वा सुभगदुब्भग-कहा, चउसटुिं च महिला गुणा, न वण्ण-देस-जाति-कुल-रूव-नाम-नेवत्थ-परिजणकहव्व इत्थियाणं, अण्णा वि य एवमादियाओ कहाओ सिंगारकलुणाओ तव-संजमबंभचेर-धातोवघातियाओ अणुचरमाणेण बंभचेरं न कहेयव्वा न सुणेयव्वा, न चितेयव्वा ।
एवं इत्थीकहविरतिसमितिजोगेण भाविता भवति अंतरप्पा, आरतमणविरयगामधम्मे जितेंदिए बंभचेरगुत्ते ॥
प्र०६८ ततियं-नारीण-हसिय-भणिय-चेट्ठिय-विप्पेक्खिय-गइ-विलास-कीलियं, विब्बोइयनट्ट-गीत-वाइय-सरीरसंठाण-वण्ण-कर-चरण-नयण-लावण्ण-रूव-जोवण्ण-पयोहर-अधर-वत्थअलंकार-भूसणाणि य, गुज्झोकासियाई, अण्णाणि य एवमादियाइं तव-संजम-बंभचेरघातोवघातियाइं अणुचरमाणेण बंभचेरं न चक्खुसा न मणसा न वयसा पत्थेयव्वाइं पावकम्माइं।
एवं इत्थीरूवविरतिसमितिजोगेण भावितो भवति अंतरप्पा, आरतमणविरयगामधम्मे जितेंदिए बंभचेरगुत्ते ।।
प्र०६९ चउत्थं-पुव्वरय-पुव्वकीलिय-पुव्वसग्गंथ-गंथ-संथुया जे ते आवाह-विवाह-चोल्लकेसु य तिथिसु जण्णेसु उस्सवेसु य सिंगारागार-चारुवेसाहिं इत्थीहिं हाव-भाव-पललिय-विक्खेवविलास-सालिणीहिं अणुकूलपेम्मिकाहिं सद्धि अणुभूया सयण-संपओगा, उदुसुह-वरकुसुमसुरभिचंदण-सुगंधिवर-वास-धूव-सुहफरिस-वत्थ-भूसणगुणोववेया, रमणिज्जाओज्ज-गेज्जपउरनड-नट्टक- जल्ल-मल्ल-मुट्ठिक-वेलंबग-कहग-पवग-लासग-आइक्खग-लंख-मंख-तूणइल्लतुंबवीणिय-तालायर-पकरणाणि य बहूणि महुरसर-गीत सुस्सराई, अण्णाणि य एवमाइयाई तव-संजम-बंभचेर-घातोवघातियाई अणुचरमाणेण बंभचेरं न ताई समणेण लब्भा दट्ठ न कहेउं नवि सुमरिउं जे।
एवं पुव्वरयपुव्वकीलियविरतिसमितिजोगेण भावितो भवति अंतरप्पा, आरयमणविरतगामधम्मे जिइंदिए बंभचेरगुत्ते ॥
प्र० ६।१० पंचमगं-आहारपणीय-निद्धभोयण-विवज्जए संजते सुसाहू ववगयखीर-दहि-सप्पिनवनीय-तेल्ल-गुल-खंड-मच्छंडिक- महु- मज्ज- मंस- खज्जक- विगति- परिचत्त कयाहारे न दप्पणं न बहुसो न नितिकं न सायसूपाहिकं न खलु, तहा भोत्तव्वं जह से जायामाता य भवति, न य भवति विब्भमो भंसणा य धम्मस्स ।।
__ एवं पणीयाहारविरतिसमितिजोगेण भावितो भवति अंतरप्पा, आरयमण-विरतगामधम्मे जिइंदिए बंभचेरगुत्ते ।।
प्र० ६।११