Agam 05 Bhagavai Panchamam Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 13

सतं-१, वग्गो-,सत्तंसत्तं-, उद्देसो-२
[३२] अह भंते! असंजयभवियदव्वदेवाणं, अविराहियसंजमाणं विराहिय संजमाणं, अविराहियसंजमासंजमाणं विराहियसंजमासंजमाणं, असण्णीणं, तावसाणं, कंदप्पियाणं, चरगपरिव्वायगाणं, किव्विसियाणं, तेरिच्छियाणं, आजीवियाणं, आभिओगियाणं, सलिंगीणं दंसणवावन्नागाणं, एएसि णं देवलोगेसु उववज्जमाणाणं कस्स कहिं उववाए पण्णत्ते? गोयमा! अस्संजतभवियदव्वदेवाणं जहन्नेणं भवणवासीसु, उक्कोसेणं उवरिमगेविज्जएसु । अविराहियसंजमाणं जहन्नेणं सोहम्मे कप्पे, उक्कोसेणं सव्वट्ठसिद्धे विमाणे विराहियसंजमाणं जहन्नेणं भवणवासीसु, उक्कोसेणं सोधम्मे कप्पे । अविराहियसंजमाऽसंजमाणं जहन्नेणं सोहम्मे कप्पे, उक्कोसेणं अच्चुए कप्पे । विराहियसंजमासंजमाणं जहन्नेणं भवणवासीसु, उक्कोसेणं जोतिसिएसु । असण्णीणं जहन्नेणं भवणवासीसु, उक्कोसेणं वाणमंतरेसु । अवसेसा सव्वे जहन्नेणं भवणवासीसु; उक्कोसगं वोच्छामि तावसाणं जोतिसिएसु । कंदप्पियाणं सोहम्मे कप्पे । चरग परिव्वायगाणं बंभलोए कप्पे । किव्विसियाणं लंतगे कप्पे । तेरिच्छियाणं सहस्सारे कप्पे । आजीवियाणं अच्चुए कप्पे । आभिओगियाणं अच्चुए कप्पे । सलिंगीणं दंसणवावन्नगाणं उवरिमगेवेज्जसु ।
[३३] कतिविहे णं भंते! असण्णियाउए पण्णत्ते? गोयमा! चउव्विहे असण्णिआउए पण्णत्ते । तं जहा-नेरइय-असण्णिआउए, तिरिक्खजोणियअसण्णिआउए, मणुस्सअसण्णिआउए, देवअसण्णिआउ | असण्णी णं भंते! जीवे किं नेरइयाउयं पकरेति, तिरिक्खजोणियाउयं पकरेइ, मणुस्साउयं पकरेइ, देवालयं पकरेइ ? हंता, गोयमा ! नेरइयाउयं पि पकरेड़, तिरिक्खजोणियाउयं पि पकरेइ, मणुस्सायं पि पकरेइ, देवाउयं पि पकरे । नेरइयाउयं पकरेमाणे जहन्नेणं दस वाससहस्साइं उक्कोसेणं पलिओवमस्स असंखेज्जइभागं पकरेति । तिरिक्खजोणियाउयं पकरेमाणे जहन्नेणं अंतोमुहुत्तं, उक्कोसेणं पलिओवमस्स असंखेज्जइभागं पकरेइ। मणुस्साए वि एवं चेव । देवाउयं पकरेमाणे जहा नेरइया ।
एयस्स णं भंते! नेरइयअसण्णि-आउयस्स तिरिक्खजोणिय असण्णिआउयस्स मणुस्सअसण्णिआउयस्स देवअसण्णिआउयस्स य कयरे कयरेहिंतो जाव विसेसाहिए वा? गोयमा ! सव्वत्थोवे देवअसण्णिआउए, मणुस्सअसण्णिआउए असंखेज्जगुणे, तिरियजोणियअसण्णिआउए असंखेज्जगुणे, नेरइयअसण्णिआउये असंखेज्जगुणे ।
सेवं भंते! सेवं भंते! त्ति ।।
* पढमे सते बितिओ उद्देसो समत्तो*
० तइओ उद्देसो ०
[३४] जीवाणं भंते! कंखामोहणिज्जे कम्मे कडे? हंता, कडे ।
से भंते! किं देसेणं देसे कडे ?, देसेणं सव्वे कडे?, सव्वेणं देसे कडे?, सव्वेणं सव्वे कडे ? |
गोयमा! नो देसेणं देसे कडे, नो देसेणं सव्वे कडे, नो सव्वेणं देसे कडे, सव्वेणं सव्वे कडे ।
नेरइयाणं भंते! कंखामोहणिज्जे कम्मे कडे? हंता, कडे जाव सव्वेणं सव्वे कडे । एवं जाव वेमाणियाणं दंडओ भाणियव्वो ।
[३५] जीवा णं भंते! कंखामोहणिज्जं कम्मं करिंसु ? हंता, करिंसु ।
तं भंते! किं देसेणं देतं करिंसु ? एतेणं अभिलावेणं दंडओ जाव वेमाणियाणं । एवं करेंति । एत्थ वि दंडओ जाव वेमाणियाणं ।
[दीपरत्नसागर संशोधितः ]
[12]
[५-भगवई