Agam 01 Aayaro Padhamam Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 24

[२१३] से जहेयं भगवया पवेदितं आसुपन्नेण जाणया पासया अदुवा गुत्ती वओगोयर, त्तिबेमि । सव्वत्थ संमयं पावं तमेव उवाइक्कम्म एस महं विवेगे वियाहिते, गामे वा अदुवा रणे नेव गामे नेव रण्णे घम्ममायाणेह - पवेदितं माहणेण मईमया, जामा तिन्नि उदाहिया जेसु इमे आयरिया संबुज्झमाणा समुट्ठिया, जे निव्वुया पावेहिं कम्मेहिं अनियाणा ते वियाहिया ।
[२१४] उड्ढं अहं तिरयं दिसासु सव्वतो सव्वावंति च णं पाडियक्कं जीवेहिं कम्मसमारंभेणं तं परिन्नाय मेहावी नेव सयं एतेहिं काएहिं दंडं समारंभेज्जा नेवऽन्नेहिं एतेहिं काएहिं दंडं समारंभावेज्जा नेवऽन्ने एतेहिं काएहिं दंड समारंभंते वि समणुजाणेज्जा, जेऽवन्ने एतेहिं काएहिं दंडं समारंभंति तेसिं पि वयं लज्जामो, तं परिण्णाय मेहावी तं वा दंडं अन्नं वा दंडं नो दंडभी दंडं समारंभेज्जासि - त्तिबेमि । अट्ठमे अज्झयणे पढमो उद्देसो सम्मत्तो
सुयक्खंधो-१, अज्झयणं-८, उद्देसो-२
• बीओ - उसो
[२१५] से भिक्खू परक्कमेज्ज वा चिट्ठेज्ज वा निसीएज्ज वा तुयट्टेज्ज वा सुसाणंसि वा सुन्नागरंसि वा गिरिगुहंसि वा रुक्खमूलंसि वा कुंभारायतणंसि वा हुरत्था वा विहरमाणं तं भिक्खुं उवसंकभित्तुं गाहावती बूया आउसंतो समणा ! अहं खलु तव अट्ठाए असनं वा पानं वा खाइमं वा साइमं वा वत्थं वा पडिग्गहं वा कंबलं वा पायपुंछणं वा पाणाइं भूयाइं जीवाई सत्ताई समारब्भ समुद्दिस्स कीयं पामिच्चं अच्छेज्जं अनिसट्ठे अभिहडं आहट्टु चेतेमि आवसहं वा समुस्सिणोमि से भुंजह वसह आउसंतो समणा ! भिक्खू तं गाहावति समणसं सवयसं पडियाइक्खे-आउसंतो ! गाहावती नो खलु ते वयणं आढामि नो खलु ते वयणं परिजाणामि जो तुमं मम अट्ठाए असनं वा पानं वा खाइमं वा साइमं वा वत्थं वा पडिग्गहं वा कंबल वा पायपुंछणं वा पाणाइं भूयाइं जीवाइं सत्ताइं समारब्भ समुद्दिस्स कीयं पामिच्चं अच्छेज्जं अनिसट्टं अभिहडं आहट्टु चेएसि आवसहं वा समुस्सिणासि, से विरतो आउसो गाहावती! एयस्स अकरणाए ।
[२१६] से भिक्खू परक्कमेज्ज वा [चिट्ठेज्ज वा निसीएज्ज वा तुयट्टेज्ज वा सुसाणंसि वा जाव हुरत्था वा कहिंचि विहरमाणं तं भिक्खु उवसंकमित्तु गाहावती आयगयाए पेहाए असनं वा पानं वा खाइमं वा साइमं वा वत्थं वा पडिग्गहं वा कंबलं वा पायपुंछणं वा जाव चेएइ आवसहं वा समुस्सिणाति तं भिक्खूं परिघासेउं, तं च भिक्खू जाणेज्जा- सहसंमइयाए परवागरणेणं अन्नेसिं वा अंतिए सोच्चा अयं खलु गाहावई मम अट्ठाए असनं वा पानं वा आवसहं वा समुस्सिणाति, तं च भिक्खू पडिलेहाए आगमेत्ता आणवेज्जा अनासेवणाए, त्तिबेमि ।
[२१७] भिक्खूं च खलु पुट्ठा वा अपुट्ठा वा जे इमे आहच्च गंथा फुसंति से हंता हणह खह छिंदह दहह पचह आलुंपह विलुंपह सहसाकारेह विप्परामुसह, ते फासे धीरे पुट्ठो अहियासए अदुवा आयारगोयरमाइक्खे तक्किया नमणेलिसं अदुवा वइगुत्तीए अनुपुव्वेण सम्मं पडिलेहाए आयतगुत्ते बुद्धेहिं यं पवेदितं ।
[२१८] से समणुन्ने असमणुन्नस्स असनं वा पानं वा खाइमं वा साइमं वा वत्थं वा पडिग्गहं वा कंबलं वा पायपुंछणं वा नो पाएज्जा नो निमंतेज्जा नो कुज्जा वेयावाडियं परं आढायमाणे, त्ति बेमि ।
[दीपरत्नसागर संशोधितः]
[23]
[१-आयारो]