Tare Te Tirth

Author(s): Jitendra T Dedhia
Publisher: Mahendra Kanji Gosar

Page 4

નિવેદન :પરમ કૃપાળુ વિતરાગી શ્રી અરિહંત પ્રભુને અમારા કોટિ કોટિ વંદન હો.
“તારે તે તીર્થ” ની બીજી આવૃતિ આપની સમક્ષ રજુ કરતાં હર્ષ અનુભવીએ છીએ.
પ્રથમ આવૃતિ પ્રકાશિત થયા પછી અનેક વડિલ અને આદરણિય સજજનોના પત્ર આવેલ છે. આ પત્રો દ્વારા સહુએ અભિનંદન અને આભારની લાગણી પ્રદર્શિત કરવા ઉપરાંત જરૂરી ફેરફારો, સૂચનો અને અંગત અભિપ્રાયો દર્શાવેલ છે. સામાન્યપણે પત્યેક પત્રમાં વધુ નકલોની જરૂરિયાત પ્રદર્શિત કરવામાં આવી જેને કારણે બીજી આવૃતિ માટેનું આયોજન શક્ય બન્યું છે. અન્ય સૂચનોમાં મુખ્યત્વે દરકે તીર્થસ્થાન અને જિનાલયો માટે શક્ય એટલી વધુ માહિતી પુરી પાડવાનો આગ્રહ રહ્યો છે. તેમજ વધુ જિનાલયો તથા તીર્થસ્થાનોનો સમાવેશ અને કેટલાક પત્રોમાં ચોક્કસ સ્થાનોનો સમાવેશ અને વિસ્તારિત માહિતી માટે આગ્રહ થયો છે. પત્રો મોક્લનાર સ્નેહીજનોનો ખૂબ ખૂબ આભાર.
જૈન ધર્મ શાશ્વત છે. ભારતવર્ષમાં જૈન ધર્મનો પ્રાચિન સમયથી પ્રભાવ રહેલ છે. જૈન પ્રજા સાહસિક, વ્યહવારકુશળ, ધર્મપ્રિય અને કલાપ્રેમી છે. વિશ્વમાં અનેક દેશોમાં જેનો વસ્યા છે અને ધર્મપ્રિય શ્રેષ્ઠિઓએ પ્રભુભક્તિ માટે જિનાલયોનું નિર્માણ કરાવ્યું છે. આ કારણે ભારતભરમાં અને અર્વાચીન સમયમાં વિશ્વના અન્ય દેશોમાં જિનાલયોનું નિર્માણ થતું રહ્યું છે. ભૌગોલિક પરિસ્થિતિઓ, આક્રમણ અને સ્થળાંતર જેવાં અનેક સાંયોગિક ફેરફારોને કારણે ઘણાં જિનાલયો અદ્રશ્ય થયાં છે. પ્રમાણભૂત માહિતીના અભાવે અને પુસ્તિકાની સ્થળસંકોચની મર્યાદાઓને કારણે આ પ્રકારની માહિતીઓના સંક્લનનું પ્રમાણ નક્કી કરવું અત્યંત કપરું કાર્ય બની રહે છે.
આ માર્ગદર્શિકાનો મુખ્ય ઉદ્દેશ યાત્રીજનો પ્રચલિત તીર્થ સ્થાનોની બની શકે તેટલી સરળતાથી અને સુગમતાથી જરૂરી માહિતી મેળવી શકે તે છે અને એ જ મૂળભૂત ઉદેશથી આ બીજી આવૃત્તિનું આયોજન થયું છે.
પ્રથમ તથા બીજી આવૃત્તિના પ્રકાશનમાં સહયોગી બનેલ દરેક સ્નેહીજનોનો અહી અંત:કરણપૂર્વક આભાર માનું છું.
જીતેન્દ્ર તલકશી દેઢિયા