Padmavati Havan

Author(s): Anandsagarsuri, Sagaranandsuri
Publisher: Nirgrantha Foundation Ahmedabad

Page 9

સંપાદક તરફથી આ પૂર્વે પ્રકાશિત થયેલ પદ્માવતી માતાના હવનની મારી પુસ્તિકાને અભૂતપૂર્વ પ્રતિસાદ મળ્યો હતો. અનેક વર્તમાનપત્રોએ, રાજકીય આગેવાનોએ અને પૂજનીય ગુરુ ભગવંતોએ પ્રથમ આવૃત્તિને દિલથી આવકારીને મને પ્રોત્સાહન આપ્યું હતું.
અગાઉના પ્રકાશનમાં મધ્યમકદના હવનવિધિનો સમાવેશ કર્યો હતો. આ વખતે તેની જ લઘુકાય આવૃત્તિ પ્રકાશિત થઈ રહી છે.
પૂર્વ પ્રકાશનમાં અને આ પ્રકાશનમાં ફરક એટલો જ છે કે આ પુસ્તિકામાં વાસ્તુને લગતા વિધિનો સમાવેશ કર્યો નથી. વાસ્તુવિધિ સહિત જેને પદ્માવતી હવન કરવું હોય તેણે તો પ્રથમ આવૃત્તિનો ઉપયોગ જ કરવાનો રહે છે.
આ પુસ્તિકામાં પ્રકાશિત થઈ રહેલ વિધિ મુજબ મારી નિશ્રામાં અનેક સ્થળોએ હવન થઈ ચૂક્યાં છે. જ્યાં જ્યાં આ વિધિ મુજબ હવન થયાં છે ત્યાં ત્યાં માતાજીની અપૂર્વ કૃપાની અનુભૂતિ ભાવિકોએ કરી છે. અન્યત્ર અન્ય ગુરુ ભગવંતો અને વિધિકારોએ પણ પ્રથમવૃત્તિના આધારે જ્યાં જ્યાં માતાજીનાં હવનો કર્યા છે ત્યાં ત્યાંથી અત્યંત પ્રોત્સાહક પરિણામોના સમાચારો મળતા રહે છે.
આ લઘુકાય હવનની પુસ્તિકા માટે અનેક પૂજ્યો અને ચાહકો તરફથી વારંવાર માગ આવતી હતી તે આજે પૂરી થઈ રહી છે. આશા છે કે ભાવિકો આ પુસ્તિકાનો ભરપૂર ફાયદો ઉઠાવશે.
વાચકોની સગવડ ખાતર આ પુસ્તિકાના પ્રકાશનમાં પ્રાચીન પદ્ધતિના કું ફીના બદલે અત્યારે પ્રચલિત ‘” મૂકવામાં આવ્યા છે. અંગત રીતે તો મને ૐ હ્રી’ જ ગમે છે, પરંતુ પ્રાચીન પદ્ધતિથી અપરિચિત વાચકોની સગવડ સાચવવી એ પણ મારું કર્તવ્ય છે. અનુભવી જ્ઞાનીઓ તરફથી મળેલું આ સૂચન સ્વીકારી લેવામાં આવ્યું છે. બીજાં પણ કેટલાંક સારાં સૂચનો સ્વીકારી લીધાં છે.
આ પૂજનની પુસ્તિકા તૈયાર કરવા પાછળના હેતુઓ અંગે પ્રથમવૃત્તિમાં વિગતવાર કહેવાઈ ગયું છે તેમાં મારા તરફથી નવું કંઈ ઉમેરવાનું રહેતું નથી.
પ્રથમ આવૃત્તિના આધારે સેંકડો સ્થળે હવનો થયાં તે પછી, કેટલાંક તત્ત્વો દ્વારા, ‘શું જૈન શાસ્ત્રોમાં હવનનું સમર્થન છે?” એવો સવાલ ખૂણેખાંચરેથી ઉપસ્થિત કરાયો છે. ભવિષ્યમાં તે અંગે વિસ્તૃત મીમાંસા કરવાનો ઉપક્રમ હોવાથી અહીં તેનો ઉત્તર આપવાનું કોઈ પ્રયોજન દેખાતું નથી.
જૈનો માટે કંઈક કરી છૂટવાની તમન્ના ધરાવતા રાજસ્થાનના માનનીય ગવર્નર શ્રી નિર્મળચંદજી જૈને આ પુસ્તિકા માટે ‘સ્વાગત' લખીને મારા પ્રયાસને બિરદાવ્યો છે. એ જ રીતે જામનગરના વર્તમાન ધારાસભ્ય અને ગુજરાતના માજી મંત્રીશ્રી પરમ ભક્ત ડૉ. દિનેશભાઈ પરમારે પણ પુસ્તિકા માટે ‘આવકાર' લખીને પોતાની ભાવનાનાં ફૂલ “મા”નાં ચરણોમાં અર્પિત કર્યા છે. તે બન્ને પ્રત્યે કૃતજ્ઞતા વ્યક્ત કરું છું. પ્રથમવૃત્તિમાંથી ગુજરાતના ભૂતપૂર્વ મુખ્યમંત્રી શ્રી કેશુભાઈ પટેલનું ઉદ્ધોધન પણ જેમનું તેમ આ પુસ્તિકામાં સમાવી લીધું છે.
સંઘચરણરજ ૨૫-૭-૨૦૦૩
મુનિ મિત્રાનંદસાગર