Padmavati Havan

Author(s): Anandsagarsuri, Sagaranandsuri
Publisher: Nirgrantha Foundation Ahmedabad

Page 8

સ્વાગત
નિગ્રંથ ફાઉન્ડેશન, અમદાવાદ દ્વારા પૂજ્ય મુનિ શ્રી મિત્રાનંદસાગરજી મહારાજશ્રી દ્વારા ‘શ્રી પદ્માવતી હવન' પુસ્તિકાની બીજી આવૃત્તિનું પ્રકાશન થઈ રહ્યું છે તે જાણીને અત્યંત આનંદ થયો છે. કોઈ પણ પુસ્તકની બીજી આવૃત્તિ થવી તે તેની ઉપયોગિતાને પૂરવાર કરે છે.
આપણી ભારતીય સંસ્કૃતિનો આધ્યાત્મિક વારસો માનવજાત અને પ્રાણીમાત્ર માટે ઉપકારક અને આશીર્વાદરૂપ છે. આપણાં આધ્યાત્મિક દર્શનશાસ્ત્રો મનુષ્યને ધર્મમય જીવન, કુદરતના કાનૂન પ્રમાણેનું જીવન, પ્રાકૃત જીવન જીવવાની કળા પ્રદાન કરે છે.
કરુણામૂર્તિ શ્રમણ ભગવાન મહાવીરસ્વામીએ ‘અહિંસા પરમો ધર્મઃ’ના સિદ્ધાંતને સાકાર કર્યો અને તે પણ એવા યુગમાં કે જ્યારે વૈદિક યજ્ઞોમાં પશુઓના બલિ ચડાવવામાં આવતા હતા. મહાવીર પ્રભુએ સમગ્ર વિશ્વને અહિંસાનો મંત્ર આપીને સમગ્ર જીવસૃષ્ટિ ઉ૫૨ કરુણાસભર ઉપકાર કર્યો છે.
યજ્ઞ અને હવનાદિ ક્રિયાઓ તો કામ, ક્રોધ, મદ, લોભ, મોહ અને અહંકાર જેવા દુર્ગુણોને બાળીને ભસ્મ કરવાની વિધિ છે. આપણા દેહમાં પણ સતત નિગ્રહ દ્વારા આવો યજ્ઞ કાયમ માટે પ્રગટ થવો જોઈએ. આ પ્રક્રિયાના પ્રતીક સમા ‘શ્રી પદ્માવતી હવન’ની આ પુસ્તિકા પ્રગટ થાય છે તે ખૂબ જ આવકારદાયક છે. જૈન તત્ત્વજ્ઞાનમાં પદ્માવતી માતાનું સ્થાન અનન્ય છે. પ્રેમ, દયા, અનુકંપા, શીલચારિત્ર્યસભર મા પદ્માવતી તો કરુણામૂર્તિ છે, વાત્સલ્યની દેવી છે.
અનેક પૂર્વાચાર્યો, મહર્ષિઓના વિવિધ મંત્રગ્રંથોના આધારે પરમ પૂજ્ય મુનિ શ્રી મિત્રાનંદસાગરજી મહારાજે ધર્મમય જીવનનાં જુદાં જુદાં પાસાંઓમાં, ધ્યાન, સાધના, ઉપાસના, મંત્ર, તંત્ર અને અગોચર વિદ્યાનાં રહસ્યો પ્રગટ કરવાનું અભ્યાસપૂર્ણ શ્રેષ્ઠ કાર્ય કર્યું છે તે માનવજાત અને પ્રાણીમાત્ર માટે ઉપકારક નીવડશે.
શ્રમણસંસ્કૃતિના પ્રહરી એવા પૂજ્ય મુનિ શ્રી મિત્રાનંદસાગરજી મહારાજ સાહેબના સૌ મુમુક્ષુઓ ઋણી રહેશે.
જામનગર
તા. ૮-૭-૨૦૦૩
– ડૉ. દિનેશ પરમાર
ધારાસભ્ય
પૂર્વ રાજ્યમંત્રી