Book Title: Ashtpahud Gatha Author(s): Hukamchand Bharilla Publisher: Todarmal Granthamala Jaipur View full book textPage 7
________________ सम्मदंसण पस्सदि जाणदि णाणेण दव्वपज्जाया । सम्मेण य सद्दहदि य परिहरदि चरित्तजे दोसे ||१८|| एए तिण्णि वि भावा हवंति जीवस्स मोहरहियस्स । णियगुणमाराहंतो अचिरेण य कम्म परिहरइ । । १९ ।। संखिज्जमसंखिज्जगुणं च संसारिमेरुमत्ता णं । सम्मत्तमणुचरंता करेंति दुक्खक्खयं धीरा ।। २० ।। दुविहं संजमचरणं सायारं तह हवे णिरायारं । सायारं सग्गंथे परिग्गहा रहिय खलु णिरायारं ।। २१ । । दंसण वय सामाइय पोसह सचित्त रायभत्ते य । बंभारंभापरिग्गह अणुमण उद्दिट्ठ देसविरदो य ।। २२ ।। पंचेव णुव्वयाइं गुणव्वयाई हवंति तह तिण्णि । सिक्खावय चत्तारि य संजमचरणं च सायारं ।। २३ ।। थूले तसकायवहे थूले मोषे अदत्तथूले य । परिहारो परमहिला परिग्गहाररंभपरिमाणं ।। २४ ।। दिसिविदि सिमाण पढमं अणत्थदंडस्स वज्जणं बिदियं । भोगोपभोगपरिमा इयमेव गुणव्वया तिण्णि ।। २५ ।। सामाइयं च पढमं बिदियं च तहेव पोसहं भणियं । तइयं च अतिहिपुज्जं चउत्थ सल्लेहणा अंते ।। २६ ।। एवं सावयधम्मं संजमचरणं उदेसियं सयलं । सुद्धं संजमचरणं जइधम्मं णिक्कलं वोच्छे ।।२७।। पंचेंदियसंवरणं पंच वया पंचविंसकिरियासु । पंच समिदि तय गुत्ती संजमचरणं णिरायारं ।। २८ ।। अमणुण्णे य मणुण्णे सजीवदव्वे अजीवदव्वे य। ण करेदि रायदोसे पंचेंदियसंवरो भणिओ ।। २९ ।। हिंसाविरइ अहिंसा असच्चविरई अदत्तविरई य । तुरियं अबंभविरई पंचम संगम्मि विरई य ।। ३० ।। साहंति जं महल्ला आयरियं जं महल्लपुव्वेहिं । जं च महल्लाणि तदो महव्वया इत्त याई ||३१|| (7)Page Navigation
1 ... 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37
