Ashtpahud Gatha

Author(s): Hukamchand Bharilla
Publisher: Todarmal Granthamala Jaipur

Page 34

गिण्हदि अदत्तदाणं परणिंदा वि य परोक्खदूसेहिं। जिणलिंगं धारंतो चोरेण व होइ सो समणो।।१४।। उप्पडदि पडदि धावदि पुढवीओखणदि लिंगरूवेण। इरियावहं धारंतो तिरिक्खजोणी ण सो समणो ।।१५।। बंधो णिरओ संतो सस्सं खंडेदि तह य वसुहं पि। छिंददि तरुगण बहुसो तिरिक्खजोणी ण सो समणो।।१६।। रागं करेदि णिच्चं महिलावग्गं परं च दूसेदि। दंसणणाणविहीणो तिरिक्खजोणी ण सो समणो ।।१७।। पव्वजहीणगहिणं णेहं सीसम्मि वट्टदे बहुसो। आयारविणयहीणो तिरिक्खजोणी ण सो समणो ।।१८।। एवं सहिओ मुणिवर संजदमज्झम्मि वट्टदे णिच्चं । बहुलं पि जाणमाणो भावविणट्ठो ण सो समणो ।।१९।। दंसणणाणचरित्ते महिलावग्गम्मि देदि वीसट्ठो । पासत्थ वि हु णियट्ठो भावविणट्ठो ण सो समणो ।।२०।। पुच्छलिघरि जो भुञ्जइ णिच्चं संथुणदि पोसए पिंडं। पावदि बालसहावं भावविणट्ठो ण सो सवणो ।।२१।। इय लिंगपाहुडमिणं सव्वंबुद्धेहिं देसियं धम्मं । पालेइ कट्ठसहियं सो गाहदि उत्तमं ठाणं ।।२२।।
शीलपाहुड वीरं विसालणयणं रत्तुप्पलकोमलस्समप्पायं । तिविहेण पणमिऊण सीलगुणाणं णिसामेह ।।१।। सीलस्स य णाणस्स य णत्थि विरोहो बुधेहिं णिद्दिट्ठो। णवरि य सीलेण विणा विसया णाणं विणासंति ।।२।। दुक्खे णजदि णाणं णाणं णाऊण भावणा दुक्खं । भावियमई व जीवो विसयेसु विरजए दुक्खं ॥३॥ ताव ण जाणदिणाणं विसयबलो जाव वट्टए जीवो। विसए विरत्तमेत्तो ण खवेइ पुराइयं कम्मं ।।४।।
(34)