Ashtpahud Gatha

Author(s): Hukamchand Bharilla
Publisher: Todarmal Granthamala Jaipur

Page 16

तेयाला तिण्णि सया रज्जूणं लोयखेत्तपरिमाणं । मुत्तूणट्ठ पएसा जत्थ ण दुरुढुल्लिओ जीवो ।।३६।। एक्केक्कंगुलि वाही छण्णवदी होंति जाण मणुयाणं । अवसेसे य सरीरे रोया भण कित्तिया भणिया ।।३७।। ते रोया वि य सयला सहिया ते परवसेण पुव्वभवे । एवं सहसि महाजस किं वा बहुएहिं लविएहिं ।।३८।। पित्तंतमुत्तफेफसकालिजयरुहिरखरिसकिमिजाले । उयरे वसिओ सि चिरं णवदसमासेहिं पत्तेहिं ।।३९।। दियसंगट्ठियमसणं आहारिय मायभुत्तमण्णांते । छदिखरिसाण मज्झे जढरे वसिओ सि जणणीए ।।४०।। सिसुकाले च अयाणे असुईमज्झम्मि लोलिओ सि तुमं । असुई असिया बहुसो मुणिवर बालत्तपत्तेण ।।४१।। मंसट्ठिसुक्कसोणियपित्तंतसवत्तकुणिमदुग्गंधं । खरिसवसापूय खिब्भिस भरियं चित्तेहि देहउडं ।।४२।। भावविमुत्तो मुत्तो ण य मुत्तो बंधवाइमित्तेण । इय भाविऊण उज्झसु गंधं अब्भंतरं धीर ।।४३।। देहादिचत्तसंगो माणकसाएण कलुसिओ धीर! । अत्तावणेण जादो बाहुबली कित्तियं कालं ।।४४।। महुपिंगो णाम मुणी देहाहारादिचित्तवावारो। सवणत्तणं ण पत्तो णियाणमित्तेण भवियणुय ।।४५।। अण्णं च वसिट्टमुणी पत्तो दुक्खं णियाणदोसेण। सो णत्थि वासठाणो जत्थ ण दुरुढुल्लिओ जीवो।।४६।। सो णत्थि तप्पएसो चउरासीलक्खजोणिवासम्मि । भावविरओ विसवणो जत्थ णं दुरुढुल्लिओ जीव ।।४७।। भावेण होइ लिंगी ण हु लिंगी होइ दव्वमित्तेण । तम्हा कुणिज्ज भावं किं कीरइ दव्वलिंगेण ।।४८।। दंडयणयरं सयलं डहिओ अब्भंतरेण दोसेण । जिणलिंगेण वि बाहू पडिओ सो रउरवे णरए ।।४९।।
(16)