Agam 39 Mahanisiham Chattham Cheyasuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 144

अज्झयणं-८ / चूलिका-२
समुद्धाइए णं सन्नद्ध-बद्धुद्धए-निसिए-करवाल - कुंत-विप्फुरंत-चक्काइ-पहरणाडोववग्गपाणी हण हण हण रावभीसणा बहु-समर-संघट्टा दिण्ण-पिट्टी जीयंतकरे अउल - बल-परक्कमे णं महाबले पर-बले जोहे । एयावसरम्मि उ कुमारस्स चलणेसु निवडिऊणं दिट्ठ- पच्चए मरण-भयाउलत्ताए अगणियकुलक्कमपुरिसयारं विप्पनासे दिसिमेक्कमासाइत्ताणं स परिकरे पणट्ठे से णं नरवरिंदे |
एत्थंतरम्मि चिंतियं गोयमा ! तेणं कुमारेणं जहा णं न मेरिसं कुलक्कमे ऽम्हाणं जं पट्ठि दाविज्जइ नो णं तु पहरियव्वं मए कस्सावि णं अहिंसा - लक्खण-धम्मं वियाणमाणेणं कय-पाणाइवायपच्चक्खाणेणं च, ता किं करेमि णं? सागारे भत्त-पाणाईणं पच्चक्खाणे अहवा णं करेमि जओ दिद्वेणं ताव मए दिट्ठी-मेत्त कुसीलस्स नामग्गहणेणावि एमहंते संविहाणगे ता संपयं कुसीलस्सावि णं एत्थं परिक्खं करेमि त्ति । चिंतिऊणं भणिउमादत्ते णं गोयमा ! से कुमारे जहा णं जइ अहयं वायामेत्तेणावि कुसीलो ता णं मा नीहरेज्जाह । अक्खय-तणुं खेमेणं एयाए - रायहाणीए । अहा णं मनो- वड् कायतिएणं सव्वपयारेहिं णं सील-कलिओ ता मा वहेज्जा ममोवरिं इमे सुनिसिए दारुणे जीयंतकरे पहरणे निहए । नमो नमो अरहंताणं ।
ति भणिऊणं जाव णं पवर-तोरण दुवारेणं चल-चवल - गई जाउमारद्धो जाव णं परिक्कमे थेवं भूमिभागं ताव णं हेल्लावियं कप्पडिग-वेसेणं गच्छइ एस नरवइ त्ति काऊणं सरहसं हण हण मर मर त्ति भणमाणुक्खित्तकरवालादि-पहरणेहिं परबल-जोहेहिं । जाव णं समुद्धाइए अच्चंत - भीसणे जीयंतकरे परबल-जोहे ताव णं अविसण्ण-अनुदुयार-भीय- अत्थ अदीनमानसेणं गोयमा ! भणियं कुमारणं जहा णं भो भो दुट्ठपुरिसा! ममोवरिं चेह एरिसेणं घोर-मातस-भावेणं अन्निए पि सुहज्झवसाय-संचिय-पुण्ण-पब्भारे एस अहं से तुम्ह पडिसत्तू अमुगो नरवती । मा पुणोवि भणेज्जासु जहा णं निलुक्को अम्हाणं भएणं, ता पहरेज्जासु जइ अत्थि वीरियं ति । जावेत्तियं भणे ताव णं तक्खणं चेव थंभिए ते सव्वे गोयमा ! परबल-जोहे सीलाहिट्ठियत्ताए तियसाणं पि अलंघणिज्जाए तस्स भारतीए जाए य निब्बल - देहे । तओ य णं धस त्ति मुच्छिऊणं निच्चेट्टे निवडिए धरणिवट्ठे से कुमारे ।
एयावसरम्मि उ गोयमा तेणं नरिंदाहमेणं गूढहियय-मायाविणा वुत्ते धीरे सव्वत्थावी समत्थे सव्वलोय समंत-धीरे भीरू वियक्खणे मुक्खे सूरे कायरे चउरे चाणक्के बहुपवंचभरिए संधिविग्गहिए निउत्ते छइल्ले पुरिसे जहा णं भो भो तुरियं रायहाणीए वज्जिंद - नील-ससि - सूरकंतादी पवरमणि-रयण-रासीए
हेमज्जुण-तवनीय-जंबूनय- सुवण्ण-भारलक्खाणं, किं बहुना ? विसुद्धबहुजच्च-मोत्तियं-विद्दुमखारि-लक्खपडिपुन्नस्स णं कोसस्स चाउरंगस्स बलस्स । विसेसओ णं तस्स सुगविय नाम - गहणस्स पुरिस-सीहस्स सीलसुद्धस्स कुमारवरस्से ति पउत्तिं आणेह जेणाहं निव्वुओ भवेज्जा । ताहे नरवइणो पणामं काऊणं गोयमा! गए ते निउत्तपुतरिसे जाव णं तुरियं चल-चवल - जइण-कम- पवन-वेगेहिं णं आरुलहिऊणं जच्चतुरंगमेहिं निउंज-गिरिकंदरुद्देस -पइरिक्काओ खणेण पत्ते रायहाणिं, दिट्ठो य तेहिं वामदाहिणभुया-पल्लवेहिं वयणं सिरोरुहे विलुंपमाणो कुमारो तस्स य पुरओ सुवण्णाभरण - नेवच्छा दस - दिसासु उज्जोयमाणी य जय सद्दमंगल-मुहला रयहरण - वावडोभयकर-कमल- विरइयंजली देवया । तं च दट्ठूणं विम्हिय भूयम लिप्प- कम्म निम्मविए ।
[दीपरत्नसागर संशोधितः ]
[143]
[३९-महानिसीहं]