________________
સાડા પાંચ વર્ષ સુધી ઉપવાસ કરી જે શુક્લ પંચમીની આરાધના કરે છે તે પાંચમી ગતિ (મોક્ષ) પામે છે. ૧૮
વ્રત પૂર્ણ થયા પછી વ્રતનું ઉજમણું કરવું. જેની ઉજમણું કરવાની શક્તિ ન હોય તે બમણું તપ કરે અને તપના જેટલા દિવસો હોય તેટલા મનુષ્યોને ભોજન આપે. ૧૯
પંચમી તપના ઉજમણાંમાં જ્ઞાનના પાંચ-પાંચ ઉપકરણો અને તેમજ દેરાસરના પાંચ પાંચ ઉપકરણો સારી રીતે કરાવે. ૨૦
ચૌદસના દિવસે તત્ત્વસ્વરૂપ ઉપવાસ અને પક્ષ્મી પ્રતિક્રમણને કરી શ્રાવક પોતાને બેય પક્ષને વિશુદ્ધ કરે છે. (પંદર દિવસનો એક પક્ષ અને કુટુંબનો બીજો પક્ષ). ૨૧
બુદ્ધિમાન ત્રણે ચોમાસીએ છઠ્ઠ (બે ઉપવાસ)નો તપ કરે. સંવત્સરીની અઠ્ઠાઈમાં અઠ્ઠમ (ત્રણ ઉપવાસ) અને સંવત્સરીએ પ્રતિક્રમણ કરે. ૨૨
સઘળીય અઠ્ઠાઈઓમાં અને વિશેષે કરી પર્વ દિવસે ઘરમાં ખાંડવું, પીસવું વિગેરે હિંસક કાર્યો (આરંભ)નો ત્યાગ કરવો. ૨૩
મોટા પર્વ પજુસણમાં સ્વચ્છ ચિત્તથી શ્રીકલ્પસૂત્ર સાંભળવું જોઈએ અને નગરમાં, જિનશાસનની ઉન્નતિને કરનારી અમારીને (અહિંસા) પ્રવર્તાવવી. ૨૪
શ્રાવકે, આટલા પોતાના ધર્મ કરીને તૃપ્તિ નહિ પામવી, (પરંતુ, સંતોષ રાખ્યા વિના હંમેશા ધર્મકાર્યો કરવા. ૨૫
વાર્ષિક પર્વમાં સાવધાન થઈ જે કલ્પસૂત્રને સાંભળે છે તે ધન્યપુરુષ આઠ ભવમાં પરમપદ (મોક્ષ) પામે છે. ૨૬
