________________
પ્રકાશકીય જૈન શાસન શિરતાજ વ્યાખ્યાન વાચસ્પતિ સુવિશાળ તપાગચ્છાધિપતિ પૂજ્યપાદ આચાર્યદેવ શ્રીમદ્ વિજયરામચંદ્રસૂરીશ્વરજી મહારાજાના પુણ્યદેહની અંતિમ સંસ્કાર સ્થલી સાબરમતી રામનગરમાં નિર્માણ પામેલ ચતુર્માનીય સંપૂર્ણ સંગેમરમરી શ્રી શંખેશ્વર ચિંતામણિ પાર્શ્વનાથ પ્રભુ આદિ જિનબિંબો, શ્રી અનંતલબ્લિનિધાન ગૌતમસ્વામીજી મહારાજા આદિ ગણધરો ભગવંતો, પૂ.આ.શ્રી વિ. વિજયાનંદસૂરીશ્વરજી મહારાજા આદિ ઉપકારી ગુરુ ભગવંતો તેમજ પરમગુરુદેવશ્રીજીના વિવિધ પર્યાયોને અનુલક્ષીને બનાવાયેલ વિવિધ બિંબોની અંજનશલાકા-પ્રાણપ્રતિષ્ઠાના પુણ્ય અવસરે આયોજિત ૨૭-૨૭ દિવસીય મહામહોત્સવ અંતર્ગત જૈન શાસનની કરોડરજ્જુ ગણાતા શ્રીશ્રુતજ્ઞાનની મહત્તાનું સૌ કોઈ આગંતુકોને જ્ઞાન થાય એ માટે શ્રી શ્રતમહાપૂજાનું અનેરું અનુષ્ઠાન યોજાયું. અપેક્ષાએ કેવળજ્ઞાન કરતાંય ચડિયાતા એવા શ્રુતજ્ઞાનના ઉદ્ગમ, વિકાસ, વિનાશ અને સંરક્ષણ અંગેના અનેકવિધ પાસાંઓનું જ્ઞાન થાય એ માટે ચલ અને અચલ અનેક રચનાઓ એક વિશાળ મંડપમાં ગોઠવવામાં આવી છે, સાથોસાથ શ્રુત સાથે સંકળાયેલ આગમાદિ ગ્રંથો પૂર્વાચાર્યો તેમજ પરમગુરુદેવશ્રીજીના જીવન અને સાહિત્યનાં દર્શન સૌને થાય એ માટેનાં આયોજનો પણ સુંદર અને આકર્ષક રૂપે ગોઠવાયાં છે. ઉદ્ઘાટન થયા બાદ વીસ દિવસ વીતી જવા છતાં રોજેરોજ હજારો ભાવુકો કતારબંધ ઊભા રહી મહાપૂજાના દર્શન કરે છે, કલાકો એ ખંડમાં ગાળે છે, પરિવાર સ્વજન મિત્રોને લાવે છે અને ફરી ફરી એની સમજ મેળવે છે, એજ એની પ્રભાવકતાનો પ્રગટ પરચો છે. વિખ્યાત સમાજનેતાઓએ અને વિદ્વાનોએ આ શ્રતમહાપૂજાની યંત્રણા-ગોઠવણને શ્રુતજ્ઞાન ભવનનું નિર્માણ કરી કાયમી રીતે સ્થાપવા હાર્દિક સૂચનો પણ કર્યા છે. આ શ્રુત મહાપૂજામાં મૂકાયેલ દરેક રચના વગેરે બાબતોના લખાણો આદિને મેળવવા માટે દર્શકો અને આગંતુકો વારંવાર પૃચ્છા કર્યા કરતા હતા. તેમની જિજ્ઞાસાને સંતોષવા ખૂબ જ ઝડપથી એ લખાણને સંકલિત-સંપાદિત કરી આ પુસ્તિકાના માધ્યમથી પ્રકાશિત કરવાનો નિર્ણય કરાયો છે.
O
~
