Nandanvan Kalpataru 2019 11 SrNo 43

Author(s): Kirtitrai
Publisher: Jain Granth Prakashan Samiti

Page 93

एगया वीसलनरवई जगडूणो पट्टणपाससंठियसत्तागारम्मि गओ । तत्थ य वीससहस्समिए नरे जिममाणे दठूणं राया जगडूसाहुं वयासी - 'अन्नं तुव इहयं अत्थु, घयं तु मम परिवेसिज्जउ' । तहा कए घयम्मि निट्ठियम्मि वीसलराएण तेल्लं परिवेसिज्जइ । जगडूसाहू नियसत्तागारम्मि घयं परिवेसित्था। तह राया जगडूपासाओ जी जी करावेइ, तं सोच्चा को वि चारणो वएइ -
वीसल ! तुं विरूवं करेइ, जगडू कारावेइ जी जी।
तुं जमावेइ तेलसुं, सोउ जमावइ घीइ॥ जगडूसाहु पइदिणं समुइयट्ठाणम्मि उवविसिऊणं जहिच्छं दाणं दासी । तत्थ काओ लज्जावंतीओ कुलंगणाओ पयडं दाणं घेत्तुं न तरेइरे। ताणं पच्छन्नभावेण दाणाय पुरओ जवणियं बंधिऊणं दाणं देइ, जेण ताओ जवणियाए अब्भंतरम्मि हत्थं पक्खित्ता दाणं गिण्हेज्जा।
एगया वीसलराओ नियपारद्धपरिक्खणटुं वेसं परावत्तिऊणं एगागी तहिं गओ, पडब्भंतरम्मि नियहत्थं पक्खिवेइ । जगडूसाहुणा सुहलक्खणंकियं करं पासिऊणं वियारियं - 'जगलोगपूयणीयस्स कासइ नरवइणो एसो करो दीसइ, दइव्वजोगेण को वि एसो विवत्तीए पडिओ अत्थि । तओ जावज्जीवं एसो सुही होज्जा तहा विहेमि' । एवं वियारित्ता नियहत्थाओ मणिमइयमुद्दिगं निक्कासित्ता तस्स करम्मि अप्पित्था । तं पासिऊणं भूवो अच्छेरं पत्तो, खणेण तेण वामकरो वि जवणियब्भंतरम्मि खित्तो । तया वि जगडूसाहुणा बिइया मुद्दिगा अप्पिया। तओ राया जगडूं आहविऊणं - 'इमं किं अत्थि' एवं वोत्तूणं ते दुवे मुद्दिगाओ दंसित्था। तं पासित्ता जगडूणा वुत्तं -
सव्वत्थ वायसा किण्हा, सव्वत्थ हरिया सुगा।
सव्वत्थ सुहिणं सुहं, दुक्खं सव्वत्थ दुक्खिणं॥ - एवं सोच्चा संतुट्ठो भूवई पणामं निसेहित्था, हथिम्मि आरोहाविऊणं गिहं पेसित्था । एवं धम्मिअत्तणं अणुकंपादाणेण छज्जेइ ।
तओ जगडूसाहू अट्ठाहियसयजिणपासाए करावित्था, सिरिसत्तुंजयम्मि सवित्थरं जत्तातिगं अकरिंसु । वरिसमज्झम्मि साहम्मियवच्छल्लट्ठगं संघच्चणट्ठगं विहेऊण अणेगदीणदुहियाण धम्मदाणेण नियजम्मं सहलं करिऊणं सग्गसुहं पावित्था । उवएसो -
जगडूणो इह दिटुंतं, अणुकंपाइदंसगं। सोच्चा सयलसोक्खटुं, तहिं जएइ सव्वया ॥ अणुकंपापयाणम्मि जगडूसाहुणो कहा समत्ता ।।
- पबंधपंचसईए