________________ લેખકનું નિવેદન પ્રેરણા અને પ્રવૃત્તિ જ્યારે જ્યારે જૈન મુનિભગવંતો ગુજરાતમાંથી મહારાષ્ટ્ર તરફ કે મહારાષ્ટ્રમાંથી ગુજરાત તરફ વિહાર કરે ત્યારે ત્યારે બીલીમોરા નગરે મુકામ કરે. મને સમાચાર મળતાં હું તેઓશ્રીનો લાભ લેવાનું ચૂકતો નહીં અને મારા ધાર્મિક સંસ્કારને કારણે તેઓશ્રી પાસે રોકાઈ જઈ આવશ્યક ક્રિયાઓ પણ કરતો. એમની સાથે ધર્મ સાહિત્ય ને સંસ્કૃતિના વાર્તાલાપમાં એવું જાણવા મળ્યું હતું કે દીપવિજય કવિરાજે બીલીમોરામાં મહાવીર સ્વામી ભગવાનનું હાલરડું રચ્યું હતું. આ હાલરડાથી બીલીમોરાનું નામ દેશ વિદેશમાં પ્રસિદ્ધ છે. પર્વાધિરાજ પર્યુષણ પર્વમાં મહાવીર જન્મ વાંચનને દિવસે હાલરડું ગાઈને ભગવાનનો જન્મોત્સવ હર્ષોલ્લાસથી ઉજવાય છે. આ કવિરાજ વિશે જૈન સમાજ વિશેષ માહિતી મેળવે તે માટે તમે કામ કરો આવી સૂચના અવાર-નવાર મળતી રહી હતી. તેના પરિણામે મને દીપવિજય કવિરાજના જીવન અને કૃતિઓ વિશે સંશોધન કરવાની શ્રુતજ્ઞાન ભક્તિ નિમિત્તે પ્રેરણા મળી. આ અગાઉ મેં કવિ પંડિત વીરવિજય એક અધ્યયન” મહાનિબંધ લખ્યો હતો એટલે આ પ્રેરણાનો પડકાર પણ ઝીલી લીધો અને લગભગ ત્રણ વર્ષનો સમય સંશોધન અને લેખનમાં વીતાવ્યો. વાહન અકસ્માતને કારણે 6 મહિના સંશોધન કાર્ય સ્થગિત થઈ ગયું
