________________
૨૦
ગોલ્ડન પીરીયડ
આત્મા ઉપર ચોટેલા કર્માણુઓનો શાંતિકાળ એ એવો ભવ્ય આશાસ્પદ કાળ છે કે જો તે કાળ દરમ્યાન આપણે ધારીએ તો આપણા ભયંકર અંધકારમય ભાવિને તદ્દન બદલી શકીએ અને પ્રકાશમય નવા જીવનનું સર્જન પણ કરી શકીએ. આપણા માટે તે ગોલ્ડન પીરીયડ ગણાય.
એ માટે આપણે શાંતિકાળ દરમ્યાન તે કર્માણુઓના દુઃખદ સ્વભાવને સુખદ સ્વભાવમાં ફેરવી નાંખવો જોઈએ. તેના લાંબા કાળને એકદમ ઘટાડી દેવો જોઈએ. કદાચ તે ય ન બને તો છેવટે તે અશુભ કર્માણુઓમાં ચોથા કે ત્રીજા પ્રકારનું જે બળ નક્કી થયેલું હોય તે તો તોડી જ નાંખવું જોઈએ.
મનમાં શુભ ભાવોમાં જો જોરદાર વૃદ્ધિ લાવી દઈએ તો તેની તાકાત એટલી બધી જોરદાર છે કે તેના પ્રભાવે પૂર્વીય અશુભ કર્માણુઓનું બળ તૂટ્યા વિના ન રહે. આ રીતે બળને પણ જો તોડી નાંખવામાં આવે; અત્યંત ઓછું કરી દેવામાં આવે તો આવા દૂબળા-પાતળા અશુભ કર્માણુઓ તેનો શાન્તિકાળ પૂર્ણ થતાં જીવને ભયંકર રાડો પડાવે તેવાં દુઃખો તો નહિ જ આપી શકે.
ભયંકર અજગરને મહિનાઓ સુધી ભૂખ્યો રાખવામાં આવે તો શું થાય ? તેની ઘણી તાકાત તૂટી જ જાય ને ? પછી કદાચ એને છૂટો પણ મૂકવામાં આવે તો ય તે શું કરી શકે ? દેખાવનો રહેશે તે અજગર ! બાકી તો માખીને ય ન ઉડાવી શકે તેવો હશે તે નિર્બળ ! બરોબર ને ? ગમે તેવો ભયંકર તે અજગર; પણ આજે તો સાવ અશક્ત જ ને ? મહાભરાડી માનવને ડરાવનારા તે અજગરને હવે નાનો છોકરો પણ હાથમાં પકડીને રમાડે ને ?
બસ, તેવી સ્થિતિ આપણે કરવાની છે તે ભયંકર અજગર જેવા વિકરાળ કર્માણુઓની !
ભૂતકાળમાં થઈ ગઈ ભૂલ ! અને તેનાથી ભયાનક ચીસ પડાવી દે, તેવાં વિકરાળ દુ:ખો આપનારા કર્માણુઓ રૂપી અજગરો ચોંટ્યા.
પણ હવે તે કર્માણુઓને અશુભ ભાવો રૂપી ભોજન આપવાનું ટાળીએ. સદા શુભ ભાવો ઊભરાવ્યા કરીએ. શુભભાવોમાં પણ વધારો કરતા રહીએ તો તેનાથી તે કર્માણુઓનું બળ તૂટી જશે. કર્માણુઓ રૂપી તે અજગર થઈ જશે સાવ નિર્બળ !
૧૪ ઘે કર્મનું કમ્પ્યુટર
