________________
આચાર્યશ્રીએ કહ્યું ‘‘તારા પરમારાધ્ય સ્વરુપ શિવજીને જ પોતાનો આ સવાલ હમણાં અહીં જ પૂછી લે. હું અત્યારે જ તને આ દેવના પ્રત્યક્ષ દર્શન કરાવું છું. પછી તેઓ જેમ કહે તેમ તું ઉપાસના કરજે.’’ રાજાએ આશ્ચર્યથી પૂછ્યું. ‘‘શું એવું થઈ શકે છે?’’ આચાર્યશ્રીએ કહ્યું ‘‘હાં, હવે હું એમને પ્રગટ કરવા માટે મંત્રજાપ શરૂ કરું છું. તું આ ધૂપદાનીમાં ધૂપ નાખતો જજે.'’ સાથે જ ગર્ભદ્વાર બંધ કરવાનો સંકેત કર્યો. આચાર્યશ્રી અને કુમારપાલ બંને અંદર સોમનાથ મહાદેવના સન્મુખ ઉભા હતા. આચાર્યશ્રી ધ્યાનસ્થ હતા અને કુમારપાલ ધૂપદાનીમાં ધૂપ નાખી રહ્યા હતા. ધૂપના ધુમાડાથી સંપૂર્ણ ગર્ભગૃહ ભરાઈ ગયો, અંધારું છવાઈ ગયું, ઘીના દીપક બુઝાઈ ગયા. ધીમે
ધીમે શંકર ભગવાનના લિંગમાંથી પ્રકાશ આવવા લાગ્યો. પ્રકાશ વધતો ગયો. એમાંથી એક દિવ્ય આકૃતિ પ્રગટ થઈ. સુવર્ણ જેવી ઉજ્જવલ કાયા, માથા ઉપર જટા, જટામાંથી વહેતી ગંગા અને ઉપર ચન્દ્રકલા. રાજાએ જમીન ઉપર પોતાના પાંચ અંગોને ઝુકાવીને (પંચાંગ) પ્રણામ કર્યા અને પ્રાર્થના કરી. ‘હે જગદીશ ! આપના દર્શનથી હું પાવન થયો છું. મારા ઉપકારી ગુરુદેવના ધ્યાનથી આપે મને દર્શન આપ્યા છે. મારો આત્મા હર્ષથી ઉછળી રહ્યો છે.’
ભગવાન સોમનાથની ગંભીર ધ્વનિ મંદિરમાં ગૂંજી ઉઠી, ‘કુમારપાલ ! મોક્ષ અપાવે એવા ધર્મની કામના હોય તો સાક્ષાત્ પરબ્રહ્મ જેવા સૂરીશ્વરજીની સેવા કર. સર્વદેવોના અવતારરૂપ, સર્વશાસ્ત્રોના પારગામી, ત્રણેય કાળના સ્વરુપના જ્ઞાતા એવા આચાર્યશ્રી હેમચન્દ્રસૂરિજીની દરેક આજ્ઞાનું પાલન કરજે, જેથી તારી સર્વ મનોકામના પૂર્ણ થઈ જશે અને તારો માનવભવ સફળ થશે.’ આટલું કહીને શિવજી સ્વપ્નની જેમ અદૃશ્ય થઈ ગયા.
રાજા આનંદવિભોર થઈ ગયા. એમણે ગુરુદેવને કહ્યું, ‘આપને તો ઈશ્વર પણ વશ છે. આપ જ મારા દેવ છો. આપ જ તાત અને આપ જ માત છો. હે ગુરુદેવ ! સિદ્ધરાજથી બચાવીને, જીવનદાન આપીને આપે મારો આ ભવ તો સુધારી લીધો છે. હવે મને શુદ્ધ ધર્મનું દાન આપીને મારો પરભવ પણ સુધારી લો.' આચાર્યશ્રીએ જોયું કે લોઢું તપી ગયું છે હવે એની ઉપર હથોડી મારવામાં મોડું કરવું એ ઉચિત નથી. એમણે કહ્યું. ‘‘કુમારપાલ ! જો તારે શુદ્ધધર્મની પ્રાપ્તિ કરવી છે તો તું સર્વપ્રથમ માંસ ભક્ષણનો ત્યાગ કરી લે.’’ એજ પળે મહાદેવજીના સમક્ષ જ કુમારપાલે પ્રતિજ્ઞા લઈ લીધી. આચાર્યશ્રીને પોતાનું કાર્ય સિદ્ધ થતું હોય એવું લાગ્યુ. બધા આનંદપૂર્વક પાટણ પાછા ફર્યા. કુમારપાલ મહારાજાના મિથ્યાત્વનું જોર ધીમે-ધીમે ઘટવા લાગ્યું. ગુરુદેવના ધર્મોપદેશથી હવે તેઓ માર્ગાનુસારી જીવન જીવવા લાગ્યા. ત્યારે એક ઘટના ઘટી.
