Agam 21 Puffiyanam Dasamam Uvvangsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 8

तए णं तस्स सोमिलमाहणस्स पव्वरत्तावरत्तकाले एगे देवे जाव एवं वयासी- हं भो! सोमिला! पव्वइया दुप्पव्वइयं ते पढम भणइ तहेव तुसिणीए संचिट्ठइ, देवो दोच्चंपि तच्चंपि वदइ सोमिला पव्वइया दुप्पव्वइयं ते, तए णं से सोमिले तेणं देवेणं दोच्चंपि तच्चपि एवं वुत्ते समाणे तं देवं अज्झयणं-३
एवं वयासी कहं णं देवाणुप्पिया! मम दुप्पव्वइयं ? तए णं से देवे सोमिलं माहणं एवं वयासी
एवं खलु देवाणुप्पिया तुमं पासस्स अरहओ पुरिसादानीयस्स अंतियं पंचाणुव्वइए सत्तसिक्खावइए दुवालसविहे सावगधम्मे पडिवन्ने तए णं तव अन्नया कयाइं असाहुदंसणेणं पुव्वरत्तावरत्तकालसमयंसि कुटुंबजागरियं जागरमाणस्स जाव पुव्वचिंतियं देवो उच्चारेइ जाव जेणेव असोगवरपायवे तेणेव उवागच्छसि उवागच्छित्ता किढिण-संकाइयं जाव तुसिणीए संचिट्ठसि तए णं अहं पुव्वरत्तावरत्तकाले तव अंतियं पाउब्भवामि हं भो सोमिला! पव्वइया दुप्पव्वइयं ते तह च्चेव देवो निरवयं भणइ जाव पंचमदिवसंमि पच्चावरण्हकालसमयंसि जेणेव उंबरपायवे तेणेव उवागए किढिण-संकाइयं ठवेसि वेदिं वड्ढेसि उवलेवण-संमज्जणं करेसि करेत्ता कट्ठमुद्दाए मुहं बंधेसि बंधेत्ता तुसिणीए संचिट्ठसि तं एवं खलु देवाणुप्पिया तव दुप्पव्वइयं ।
तते णं से सोमिले तं देवं एवं वयासि कहं णं देवाणुप्पिया! मम सुप्पव्वइत्तं ? तए णं से देवे सोमिलं एवं वयासि- जइ णं तुमं देवाणुप्पिया इयाणिं पुव्वपडिवण्णाइं पंच अनुव्वयाइं सयमेव उवसंपज्जित्ता णं विहरसि तो गं तुब्भं इयाणिं सुपव्वइयं भवेज्जा, तए णं से देवे सोमिलं वंदइ नमसइ वंदित्ता नमंसित्ता जामेव दिसिं पाउब्भूए तामेव दिसिं पडिगए, तए णं से सोमिले माहणरिसी तेणं देवेणं एवं वुत्ते समाणे पुव्वपडिवण्णाइं पंच अनुव्वयाइं सयमेव उवसंपज्जित्ता णं विहरइ,
तए णं से सोमिले बहूहिं चउत्थ-छट्टट्ठम जाव मासद्धमास खमणेहिं विचित्तेहिं तवोवहाणेहिं अप्पाणं भावेमाणे बहूइं वासाइं समणोवासगपरियागं पाउणइ पाउणित्ता अद्धमासियाए संलेहणाए अत्ताणं झूसेइ झूसेत्ता तीसं भत्ताइं अणसणाए छेदेइ छेदेत्ता तस्स ठाणस्स अनालेइयपडिक्कंते विराहियसम्मत्ते कालमासे कालं किच्चा सुक्कवडिंसए विमाने उववायसभाए देवसयणिज्जंसि जाव ओगाहणाए सुक्कमहग्गहत्ताए उववन्ने, तए णं से सुक्के महग्गहे अहणोववन्ने समाणे जाव भासमणपज्जत्तीए पज्जत्तभावं गए, एवं खलु गोयमा! सुक्केणं महग्गेणं सा दिव्वा जाव अभिसमन्नागए एग पलिओवमं ठिई, सुक्के णं भंते! महग्गहे ताओ देवलोगाओ आउक्खएणं कहिं गच्छिहिइ ? गोयमा! महाविदेहे वासे सिज्झिहिइ जाव सव्वदुक्खाणमंतं काहिइ एवं खलु जंबू० समणेणं निक्खेवो० त्ति बेमि |
0 चउत्थं अज्झयणं-बहुत्तिया 0 [८] जइ णं भंते! उक्खेवओ० एवं खलु जंबू तेणं कालेणं तेणं समएणं रायगिहे नामं नयरे, गुणसिलए चेइए, सेणिए राया, सामी समोसढे, परिसा निग्गया, तेणं कालेणं तेणं समएणं बहुपुत्तिया देवी सोहम्मे कप्पे बहुपुत्तिए विमाने सभाए सुहम्माए बहुपुत्तियंसि सीहासनंसि चउहिं सामाणियसाहस्सीहिं चउहिं महत्तरियाहिं जहा सूरियाभे जाव भुंजमाणी विहरइ,
इमं च णं केवलकप्पं जंबुद्दीवं दीवं विउलेणं ओहिणा आभोएमाणी-आभोएमाणी पासइ पच्छा समणं भगवं महावीरं जहा सूरियाभो जाव नमंसित्ता सीहासनवरंसि पुरत्थाभिमुहा संनिसण्णा आभिओगा जहा सूरियाभस्स सूसरा घंटा, आभिओगं देवं सद्दावेइ, जाण विमाणं वण्णओ जाव उत्तरिल्लेणं [दीपरत्नसागर संशोधितः]
[7]
[२१-पुप्फियाणं]