Agam 09 Ang 09 Anuttaropapatik Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 7

अणुत्तरोववाइ सुत्त
सामी समोसढे । सेणिओ णिग्गओ | जहा मेहो तहा जाली वि णिग्गओ, तहेव णिक्खंतो जहा मेहो । एक्कारस अंगाइं अहिज्जइ । गुणरयणं तवोकम्मं जहा खंदगस्स | एवं जा चेव खंदगस्स वत्तव्वया, सा चेव चिंतणा, आपुच्छणा, थेरेहिं सद्धिं विउलं पव्वयं तहेव दुरूहइ । णवरं सोलस वासाइं सामण्ण परियागं पाउणित्ता कालमासे कालं किच्चा उड्ढं चंदिमसुर जाव णवगेवेज्जयविमाणपत्थडे उड़ढं दुरं वीईवइत्ता विजय विमाणे देवत्ताए उववण्णे। तए णं थेरा भगवंतो जालिं अणगारं कालगयं जाणित्ता परिणिव्वाणवत्तियं काउस्सग्गं करेंति, करित्ता पत्तचीवराइं गेण्हंति तहेव उत्तरंति जेणेव समणे भगवं महावीरे तेणेव उवागच्छंति, समणं भगवं महावीरं वंदंति णमंसंति, वंदित्ता णमंसित्ता एवं वयासी- एवं खलु देवाणुप्पियाणं अंतेवासी जाली णामं अणगारे पगइभद्दए पगइविणीए पगइउवसंते पगइपयणुकोहमाण-माया-लोभे मिउमद्दवसंपण्णे अल्लीणे भद्दए विणीए । से णं देवाणुप्पिएहि अब्भणुण्णाए समाणे सयमेव पंच महव्वयाणि आरोवित्ता, समणा य समणीओ य खामेत्ता, अम्हेहिं सद्धिं विपुलं पव्वयं दुरूहइ, तं चेव णिरवसेसं जाव इमे य से आयारभंडए। भंते! ति भगवं गोयमे समणं भगवं महावीरं वंदइ णमंसइ, वंदित्ता णमंसित्ता एवं वयासीएवं खलु देवाणुप्पियाणं अंतेवासी जाली णामं अणगारे पगइभद्दए जाव विणीए, से णं जाली अणगारे कालगए कहिं गए, कहिं उववण्णे? एवं खलु गोयमा ! ममं अंतेवासी जाली णामं अणगारे पगइभद्दए जाव विणीए मम अब्भणुण्णाए समाणे सयमेव पंच महव्वयाइं आरुहेत्ता, तं चेव सव्वं अवसेसियं णेयव्वं, जाव कालगए उड्ढं चंदिम सूर- गहगण- णक्खत्त- तारारूवाणं बहूई जोयणाई, बहूइं जोयणसयाई, बहूइं जोयणसहस्साइं, बहूइं जोयणसयसहस्साई, बहूई जोयणकोडीओ, बहूइं जोयणकोडाकोडीओ उड्ढं दूरं उप्पइत्ता सोहम्मीसाणसणंकुमार माहिंदबंभलंतगमहासुक्कसहस्साराणय-पाणयारणच्चुए तिण्णि य अट्ठारसुत्तरे गेवेज्ज विमाणावाससए वीईवइत्ता विजए महाविमाणे देवत्ताए उववण्णे । जालिस्स णं भंते ! देवस्स केवइयं कालं ठिई पण्णत्ता ? गोयमा ! बत्तीसं सागरोवमाइं ठिई पण्णत्ता । से णं भंते ! ताओ देवलोयाओ आउक्खएणं, भवक्खएणं, ठिइक्खएणं कहिं गच्छिहिइ, कहिं उववज्जिहिइ?
गोयमा ! महाविदेहे वासे सिज्झिहिइ । ___ एवं खलु जंबू समणेणं भगवया महावीरेणं जाव संपत्तेणं अणुत्तरोववाइयदसाणं पढमस्स वग्गस्स पढमस्स अज्झयणस्स अयमढे पण्णत्ते।
॥ पढमं अज्झयणं समत्तं ॥