Agam 09 Ang 09 Anuttaropapatik Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 6

अणुत्तरोववाइ सुत्त
पढमो वग्गो पढमं अज्झयणं
जाली
१
तेणं कालेणं तेणं समएणं रायगिहे णयरे । अज्ज सुहम्मस्स समोसरणं । परिसा णिग्गया जाव जंबू पज्जुवासमाणे एवं वयासी- जइ णं भंते ! समणेणं भगवया महावीरेणं जाव संपत्तेणं अट्ठमस्स अंगस्स अंतगडदसाणं अयमढे पण्णत्ते, णवमस्स णं भंते ! अंगस्स अणुत्तरोववाइयदसाणं समणेणं भगवया महावीरेणं जाव संपत्तेणं के अढे पण्णत्ते ? तए णं से सुहम्मे अणगारे जंबू अणगारं एवं वयासी- एवं खलु जंबू! समणेणं भगवया महावीरेणं जाव संपत्तेणं णवमस्स अंगस्स अणुत्तरोववाइयदसाणं तिण्णि वग्गा पण्णत्ता। जइ णं भंते ! समणेणं भगवया महावीरेणं जाव संपत्तेणं णवमस्स अंगस्स अणुत्तरोववाइयदसाणं तओ वग्गा पण्णत्ता, पढमस्स णं भंते! वग्गस्स अणुत्तरोववाइयदसाणं समणेणं भगवया महावीरेणं जाव संपत्तेणं कई अज्झयणा पण्णत्ता ? एवं खलु जंबू ! समणेणं भगवया महावीरेणं जाव संपत्तेणं अणुत्तरोववाइय- दसाणं पढमस्स वग्गस्स दस अज्झयणा पण्णत्ता, तं जहाजालि-मयालि-उवयाली, परिससेणे य वारिसेणे य । दीहदंते य लढदंते य, वेहल्ले वेहायसे अभए इ य कुमारे ॥ जइ णं भंते! समणेणं भगवया महावीरेणं जाव संपत्तेणं पढमस्स वगस्स दस अज्झयणा पण्णत्ता, पढमस्स णं भंते ! अज्झयणस्स समणेणं भगवया महावीरेणं जाव संपत्तेणं के अद्वे पण्णत्ते ? एवं खलु जंबू ! तेणं कालेणं तेणं समएणं रायगिहे णयरे, रिद्धिस्थिमिय समिद्धे । गुणसिलए चेइए | सेणिए राया, धारिणी देवी । सीहो सुमिणे । जालीकुमारो | जहा मेहो अट्ठट्ठओ दाओ जाव अण्णं च विपुलं धण कणग-रयण-मणिमोत्तिय-संख-सिलप्पवालरत्तरयण-संतसार-सावएज्जं अलाहि जाव आसत्तमाओ कुलवंसाओ पकामं दाउं, पकामं भोत्तुं, पकामं परिभाएउं । तए णं से जालीकुमारे एगमेगाए भारियाए एगमेगं हिरण्णकोडिं दलयइ, एगमेगं सुवण्णकोडिं दलयइ, जाव एगमेगं पेसणकारिं दलयइ, अण्णं च विउलं धणकणग जाव परिभाएउं दलयइ । तए णं जाली कुमारे उप्पिं पासाय वरगए जाव माणुस्सए कामभोगे पच्चणुभवमाणे विहरइ ।