Prabhu Puja Swadravyathi ke Devdravyathi

Author(s): Kirtiyashvijay
Publisher: Sanmarg Prakashan

Page 46

શ્રી જૈનશાસનની મર્યાદાને લોપીને એ દ્રવ્યનો ઉપયોગ થઈ શકે નહિ. જેણે ફાવતો ઉપયોગ કરવો હોય, તેણે વચ્ચે શ્રી જિનને કે શ્રીજિનની આજ્ઞાને વચ્ચે લાવ્યા વિના જ ભંડોળ કરવું જોઈએ, પણ વચ્ચે શ્રીર્જિનને કે શ્રી જિનાજ્ઞાને લાવ્યા એટલે એનો ઉપયોગ શ્રી જૈનશાસનની મર્યાદા મુજબ જ થઈ શકે.
શ્રી જિનમંદિરાદિ ધર્મસ્થાનોનો અને એની મિલ્કતનો શ્રીસંઘ માલિક પણ ગણાય, પણ તે સ્વતંત્ર વહીવટદાર માલિક નહિ. વ્યવસ્થા, રક્ષા વગેરે શ્રીસંઘ કરે, પણ તે શ્રી જિનાજ્ઞાને અનુસરીને અને શ્રીજિનાજ્ઞાને બાધ ન પહોંચે એવી રીતે કરે. એટલા માટે, આપણે પહેલાં જ એ વાત કરી કે શ્રી તીર્થંકરવત્ નમસ્કરણીય શ્રીસંઘ પણ શ્રીજિનાજ્ઞાને આધીન હોય.
જે સમુદાય શ્રી જિનાજ્ઞાને આધીન નહિ, તે ગમે તેટલો મોટો હોય, એ શ્રીસંઘ પણ નહિ અને એથી એ શ્રીતીર્થંકરવત્ નમસ્કરણીય પણ નહિ.
તિલકની કિંમત છે ?
આવા પ્રકારની ભાવના જેઓમાં નથી અગર તો જેઓમાં આવા પ્રકારનો સેવકભાવ નથી, તેઓના હાથમાં શ્રી જિનમંદિરાદિનો વહીવટ, એ ભયનું સ્થાન છે. આ વાત તરફ પણ ખાસ લક્ષ્ય દોરવું પડે, એવી સ્થિતિ સર્જાઈ છે અને સર્જાતી જાય છે. આપણે બધા જૈન છીએ, એટલે જ આ આપણું સ્થાન છે ને ?
જૈન એટલે ?
શ્રી જિનનો સેવક જ ને ? શ્રી જિનની આજ્ઞાનો ઉપાસક ને ?’
શ્રી જિનમંદિરાદિ, શ્રી જિનની આજ્ઞાને પામવા અને પાળવા માટે છે ને ? આ બધાં સ્થાનો સંસારથી તરવાને માટે છે ને ? ત્યારે સંસારથી તારે કોણ ? શ્રી જિનની આજ્ઞા તારે કે આપણી સ્વેચ્છા તારે ?
આપણે, આપણા મન-વચન-કાયાના યોગો, શ્રી જિનની આજ્ઞાને સમર્પિત થઈ જાય, તો જ આ ભયંકર એવા પણ ભવસાગરથી તરી જવાય. આવાં તારક સ્થાનોને પામવા છતાં પણ શ્રી જિનાજ્ઞા પ્રત્યે સમર્પણભાવ આવે નહિ, તો આ સ્થાનો દ્વારા પણ ડૂબી જવાય એમ પણ બને.
૧૭ - પ્રભુપૂજા સ્વદ્રવ્યથી કે દેવદ્રવ્યથી?
www
૩૯