Kappasuttam Vhas Vises Chunni Sahiyam Part 01

Author(s): Bhadrabahuswami, Sanghdasgani Kshamashraman,
Publisher: Shubhabhilasha Trust

Page 485

४०४
विसेसचुण्णि
[संखडिपगयं कप्पइ गिलाणगट्ठा, संखडिगमणं दिया व रातो वा । दव्वम्मि लब्भमाणे, गुरुउवदेसो त्ति वत्तव्वं ॥३१९०॥ पुद्वि ता सक्खेत्ते, असंखडी संखडीसु वी जतति । पडिवसभमलब्भंते, ता वच्चति संखडी जत्थ ॥३१९१॥ उज्जेंत णायसंडे, सिद्धसिलादीण चेव जत्तासु । सम्मत्त भाविएसुं, ण हुंति मिच्छत्तदोसा उ ॥३१९२॥ एतेसिं असईए, इतरीउ वयंति तत्थिमा जतणा । पुट्ठो अतिक्कमिस्सं, कुणति व अण्णावदेसं तु ॥३१९३॥ तहियं पुव्वं गंतुं, अप्पोवासासु ठाति वसहीसु । जे य अविपक्कदोसा, ण णेति ते तत्थ अगिलाणे ॥३१९४॥ विणा उ ओभासित संथवेहिं, जं लब्भती तत्थ उ जोग्गदव्वं । गिलाणभुत्तुव्वरियं तगं तु, न भुंजमाणा वि अतिक्कमंति ॥३१९५॥
"कप्पइ गिलाण०" ["पुट्विं ता" "उज्जेंत णायसंडे०" "एतेसिं०" "तहियं पुव्वं०" "विणा उ०'"] गाहासिद्धमेव । 'अण्णावदेसं तु' त्ति । सावगादीहिं चत्थ अरिट्ठा कया (?) तं निमित्तं गच्छामो । अविपक्कदोसा णामं जे असमत्था णिग्गहे उं इंदियकसायादीणि, अविकोविता वा दव्वालंभेण गया । तत्थ जइ उच्चूरं चेव लब्भइ तो नत्थि गिलाणणिमित्तं ओभासणा । अह न लब्भइ ओभासं ताए माणपत्ते य णिवारयति । जइ भणंतिकिं ओभासणा गिण्हह वा दिज्जमाणं? उच्यते-'गुरूवदेसो त्ति वत्तव्वं' । गुरु वेज्जा, तस्सवदेसेणं पत्तामो, एत्तियं वा गिण्हामो । अस्य व्याख्या -
ओभासियं जं तु गिलाणगट्ठा, तं माणपत्तं तु णिवारयति । तुब्भे व अण्णे व जया तु बेंति, भुंजेत्थ तो कप्पति णऽण्णहा तू ॥३१९६॥ दिणे दिणे दाहिसि थोव थोवं, दीहा रुया तेण ण गिहिमोऽम्हे । ण हावयिस्सामो गिलाणगस्सा, तुब्भे व ता गिण्हह गिण्हणेवं ॥३१९७॥
"ओभासियं०" ["दिणे दिणे०'"] वृत्तं कण्ठ्यम् । अणोभट्ठ गिलाणभुत्तुव्वरियं भुंजमाणा वि णातिक्कमंति । 'जं गं तु' त्ति जइ एवं भणइ । एवं ताव असेस लब्भमाणे ।
१. जया तु मुच ।