________________
થાય છે. અને તે સંખ્યા અજિતનાથ પ્રભુના વારામાં થઇ હતી હાલ ભરત તથા ઐરાવત ક્ષેત્રમાં કોઇ તીર્થકર ભગવાન વિચરતા નથી. પણ મહાવિદેહમાં વીશ તીર્થકરો વિચરે છે. તો તે ૧૭૦ તીર્થકરો, હાલ વિચરતા ૨૦ વિહરમાન તીર્થકરો, અતીત એટલે ભૂતકાળમાં થયેલા અનંત તીર્થકરો, અને અનાગત એટલે ભવિષ્યકાળમાં થનારા અનંતા તીર્થકરોને યાદ કરીને નમસ્કાર, કુસુમાંજલિપૂજન વિગેરે જે આ સ્નાત્રમાં કરવામાં આવ્યા, તે સ્નાત્રને પ્રતિદિન ભણવાથી તથા ગાવાથી ભવ્ય જીવો ઉત્તરોત્તર મંગળમાળાને વરે છે.
તીર્થકર પ્રભુનું નામસ્મરણ એ ભાવમંગળ હોવાથી સંસારરૂપી મહાન અપમંગળને ટાળનારું છે. ઉત્તમ ભાવમંગળથી વિહ્નો ચુરાઇ જાય છે. આપત્તિઓના વાદળ વિખરાઈ જાય છે. અસાધ્ય દર્દો અને રોગો નાબુદ થાય છે. સંપત્તિઓ ચરણમાં આળોટવા માંડે છે. દિવ્ય સુખો પણ સુલભ બને છે. ચરણમાં આળોટતા કંચન અને કામિનીના સુખને ફગાવી દેવાની તીવ્ર તમન્ના જાગે છે. એ તમન્નાનું પર્યવસાન કઠોર સંયમના પાલનમાં થાય છે. કઠોર સંયમ કર્મોની અભેદ્ય જંજીરને તોડી નાખે છે, અને અંતિમ પુરુષાર્થ તથા પરમ ધ્યેય રૂપ જે મોક્ષ, તેનું સંપાદન સુખપૂર્વક કરાવી શકે છે.
સિદ્ધિગતિના અક્ષય અને અનંત સુખને સર્વ જીવો વરે એજ અંતિમ અભિલાષા.
