Book Title: Agam 30A Gacchayaro Sattamam Painnayam Mulam PDF File Author(s): Dipratnasagar, Deepratnasagar Publisher: Deepratnasagar View full book textPage 9
________________ गाहा-१०१ - [१०१] जत्थ य गोयम ! पंचण्ह कह वि सूणाण इक्कमवि हुज्जा | तं गच्छं तिविहेणं वोसिरिय वएज्ज अन्नत्थ ।। [१०२] सूणारंभपवत्तं गच्छं वेसुज्जलं न सेविज्जा | जं चारित्तगुणेहिं तु उज्जलं तं तु सेविज्जा ।। [१०३] जत्थ य मुणिणो कयविक्कयाई कुव्वंति संजमुब्भट्ठा । तं गच्छं गुणसायर ! विसं व दूरं परिहरिज्जा [१०४] आरंभेसु पसत्ता सिद्धंतपरम्मुहा विसयगिद्धा । मोत्तुं मुणिणो गोयम ! वसिज्ज मज्झे सुविहियाणं ।। [१०५] तम्हा सम्म निहाले, गच्छं सम्मग्गपट्ठियं । वसिज्जा पक्ख मासं वा, जावज्जीवं तु गोयम [१०६] खुड्डो वुड्ढो तहा सेहो, जत्थ रक्खे उवस्सयं । तरूणो वा जत्थ एगागी, का मेरा तत्थ भासिमो ? || [१०७] जत्थ य एगा खुड्डी एगा तरूणी उ रक्खए वसहिं । गोयम ! तत्थ विहारे का सुद्धी बंभचेरस्स ? || [१०८] जत्थ य उवस्सयाओ बाहिं गच्छे मुहत्तमित्तंपि । एगा रत्तिं समणी का मेरा तत्थ गच्छस्स ?, || [१०९] जत्थ य एगा समणी एगो समणो य जंपए सोम्म नियबंधुणा वि सद्धिं तं गच्छं गच्छगुणहीनं [११०] जत्थ जयारमयारं समणी जंपइ गिहत्थपच्चक्खं । पच्चक्खं संसारे अज्जा परिक्खिवइ अप्पाणं [१११] जत्थ य गिहत्थभासाहिं भासए अज्जिया सुरुट्ठावि । तं गच्छं गुणसायर ! समण-गुण-विवज्जियं जाण ।। [११२] गणि गोयम ! जा उचियं, सेयं वत्थं विवज्जिऊ | सेवए चित्तरूवाणि, न सा अज्जा वियाहिया ।। [११३] सीवणं तुन्नणं भरणं, गिहत्थाणं तु जा करे । तिल्लउव्वट्ठणं वा वि, अप्पणो य परस्स य ।। [११४] गच्छइ सविलासगई सयनीयं तूलियं सबिब्बोयं । उव्वट्टेड सरीरं सिणाणमाईणि जा कुणइ ।। [११५] गेहेसु गिहत्थाणं गंतूण कहा कहेइ काहीआ । तरूणाइ अहिवडते अनुजाणे सा उ पडिनीया [११६] वुड्ढाणं तरूणाणं रत्तिं अज्जा कहेइ जा धम्म । सा गणिणी गुणसायर ! पडिनीया होइ गच्छस्स [११७] जत्थ य समणीणमसंखडाई गच्छंमि नेव जायंति । तं गच्छं गच्छवरं गिहत्थभासाओ नो जत्थ ।। - - - - [दीपरत्नसागर-संशोधितः] [8] [३०|१|गच्छायारो]Page Navigation
1 ... 7 8 9 10 11
